SHBA, Biden e vë theksin tek konsensusi politik, pas kompromisit për tavanin e borxhit

Pas disa javësh negociatash të vështira, Presidenti Joe Biden e vuri theksin tek aftësia e tij për të arritur kompromis me republikanët kur iu drejtua vendit të premten pas miratimit të Ligjit për Përgjegjësinë Fiskale.

Kompromisi është një temë së cilës ai do t’i rikthehet në fushatën e rizgjedhjes në vitin 2024.

Masa e miratuar të premten që presidenti do ta nënshkruajë të shtunën, pezullon kufirin e borxhit të qeverisë amerikane deri në janar 2025 dhe shmang mospagimin e detyrimeve të qeverisë amerikane që mund të kishte pasoja katastrofike.

“Është thelbësore për të gjithë përparimin që kemi bërë në vitet e fundit, që të ruajmë besimin dhe kredinë e Shteteve të Bashkuara dhe miratimin e një buxheti që të vazhdojë të rrisë ekonominë tonë dhe të pasqyrojë vlerat tona si komb,” tha zoti Biden nga Zyra Ovale.

Ai theksoi se miratimi i projektligjit ishte kritik. Duke nënvizuar arritjet legjislative dypartiake të arritura gjatë administratës së tij, Presidenti Biden nënvizoi se e vetmja mënyrë se si mund të funksionojë demokracia amerikane është “përmes kompromisit dhe konsensusit”.

“Askush nuk mori gjithçka që donte, por populli amerikan mori atë që i duhej,” tha ai lidhur me legjislacionin për tavanin e borxhit.

“Ne shmangëm një krizë ekonomike dhe një kolaps ekonomik”, tha ai.

Zoti Biden tha se do të nënshkruajë projektligjin të shtunën. Ishte hera e parë që presidenti Biden foli drejtpërdrejt para vendit nga Zyra Ovale, ambienti më zyrtar i Shtëpisë së Bardhë nga ku zakonisht presidentët flasin për tema të rëndësisë maskimale.

Projektligji i miratuar i lejon qeverisë të vazhdojë të marrë hua gjatë 19 muajve të ardhshëm për të përmbushur detyrimet e saj, duke tejkaluar kufirin aktual të borxhit prej 31.4 trilion dollarësh.

Mbështetje dypartiake

Senati amerikan votoi të enjten në mbrëmje 63-36 në mbështetje të projektligjit.

Senatorët demokratë John Fetterman, Elizabeth Ëarren, Ed Markey, Jeff Merkley dhe Bernie Sanders, një i pavarur që voton me demokratët, iu bashkuan 31 republikanëve duke votuar kundër projektligjit.

Projektligji u miratua në Dhomën e Përfaqësuesve me një votim 314-117 të mërkurën mbrëma.

Ligji nuk përcakton një kufi të ri monetar, por autoriteti i huamarrjes do të shtrihet deri me 2 janar të vitit 2025, dy muaj pas zgjedhjeve presidenciale të vitit të ardhshëm.

Për më tepër, ligji kërkon mbajtjen e pjesës më të madhe të shpenzimeve federale në nivelin aktual në vitin fiskal duke filluar në tetor, me një rritje prej 1 për qind në 12 muajt pasues.

Masa nuk i rrit taksat dhe as nuk do të ndalojë rritjen e borxhit kombëtar, ndoshta me 3 trilionë dollarë ose më shumë gjatë një viti e gjysmë, deri në skadimin e saj.

Pjesë të tjera përfshijnë një pakësim të numrit të agjentëve të rinj që do të punësojë agjencia e grumbullimit të taksave, një kërkesë që shtetet të kthejnë 30 miliardë dollarë ndihma të pashpenzuara të marra për pandeminë e koronavirusit nga qeveria federale dhe rritjen nga 50 në 54 vjeç, për grupmoshat që duhet të punojnë, për t’u kualifikuar për ndihma ushqimore.