Raporti gjashtëmujor i Sekretarit të Përgjithshëm të OKB-së Antonio Guterres për situatën në Kosovë po diskutohet në një takim të Këshillit të Sigurimit të OKB-së.
Diplomati amerikan në OKB Robert Wood, tha se SHBA mbështet rrugën evropiane të Kosovës. Sipas tij duhet të ketë angazhim për njohje reciproke Kosovë-Serbi.
“Dua të theksoj përkushtimin tonë për stabilitet në Ballkanin perëndimor. ShBA mbështet rrugëtimin e Kosovës. Dua të ketë angazhim në dialogun e udhëhequr nga BE të përqendruar tek njohja reciproke mes dy vendeve”, tha ai.
Përfaqësuesi i SHBA në Këshillin e Sigurimit ka kërkuar që të reduktohet edhe më tej deri në mbyllje misioni i UNMIK-ut në Kosovë. Ai thotë se autoritetet e Kosovës janë në gjendje të mbajnë nën kontroll situatën.
“Propozojmë që edhe raportimi për Kosovën në Këshillin e Sigurimit të mos mbahet çdo gjashtë muaj”, ka thënë përfaqësuesi amerikan.
Njëjtë ka kërkuar edhe përfaqësuesi i Britanisë së Madhe. Ai ka kërkuar largimin e UNMIK-ut nga Kosova pasi sipas tij situata në terren ka ndryshuar.
Koordinatori Politik i Mbretërisë së Bashkuar në OKB, Fergus Eckersley, në fjalën e tij në mbledhjen e Këshillit të Sigurimit për Kosovën tha se normalizimi i marrëdhënieve ndërmjet Kosovës dhe Serbisë është jetike.
“Normalizimi i marrëdhënieve ndërmjet Kosovës dhe Serbisë mbetet jetik. Ne ritheksojmë mbështetjen tonë të plotë për dialogun e lehtësuar nga BE-ja ndërmjet Serbisë dhe Kosovës. Tani është momenti që të dyja palët të angazhohen në dialog me mirëbesim, të respektojnë angazhimet e tyre të dialogut dhe të shmangin veprimet apo retorikën që mund të zvogëlojë perspektivat për arritjen e një marrëveshjeje normalizimi gjithëpërfshirëse dhe të qëndrueshme, në dobi të njerëzve të të dy vendeve”, tha Eckersley.
Discussion about this post