Në të njëjtën orë kur në Tiranë mazhoranca socialiste miratoi me 77 vota pro dhe 36 kundër ligjin e shumëdebatuar “Për barazinë gjinore”, në Washington, Gjykata Supreme e SHBA dha një vendim historik që shkon në drejtim të kundërt: e njohu zyrtarisht ekzistencën e vetëm dy gjinive, burrë dhe grua.
Gjykata Supreme e SHBA-së i dha të drejtë Donald Trump-it për të zbatuar politikën që ndalon ndërrimin e gjinisë në pasaportë. Me vendimin e ri, në dokumente zyrtare do të figurojë vetëm gjinia e lindjes, mashkull apo femër.
Në praktikë, kjo do të thotë se SHBA do të njohë vetëm dy gjini, mashkull dhe femër, bazuar në certifikatën e lindjes.
Vendimi, i mbështetur nga shumica konservatore e Gjykatës, cilësohet si fitore e madhe për kampin tradicionalist, ndërsa tre gjyqtaret liberale dolën kundër, duke paralajmëruar se ky vendim mund të shtojë diskriminimin ndaj personave transgjinorë.
Në Shqipëri ndërkohë, `Rilindja` miratoi ligjin për “barazinë gjinore”, që sipas qeverisë është në “harmoni me standardet e Bashkimit Europian”.
Por jashtë Parlamentit, qindra qytetarë protestuan me pankarta ku shkruhej: “Ka vetëm dy gjini, mashkull dhe femër”, “Jo ligjit anti-familje”, “Mos prekni fëmijët”.
Shumë e shohin ligjin e ri si hap drejt konceptit të “vetëpërcaktimit gjinor”, që në përkthim të lirë nënkupton se çdo person mund të zgjedhë vetë gjininë e tij në çdo moment.
Ndërsa mbështetësit e quajnë “përparim”, kritikët mendojnë se është përmbysje e logjikës natyrore dhe një tentativë për të zbehur rolin e familjes tradicionale shqiptare.
Në të njëjtën ditë, në dy anë të botës, u dhanë dy sinjale krejt të kundërta: Amerika i rikthehet biologjisë, Shqipëria eksperimenton me identitetin.
Discussion about this post