SHBA-ja dhe Kina kanë zgjatur afatin e armëpushimit tregtar deri më 10 nëntor, vetëm disa orë përpara se dy ekonomitë më të mëdha në botë të vendosnin për rritjen e tarifave ndaj njëra-tjetrës, raportoi BBC.
“Tarifat e larta do të pezullohen për 90 ditë të tjera”, thanë Pekini dhe Uashingtoni në një deklaratë të përbashkët.
Bisedimet mes dy palëve, muajin e kaluar u konsideruan “konstruktive”.
Më herët, negociatori kryesor i Kinës tha se të dyja palët po bënin përpjekje për të zgjatur afatin e armëpushimit tregtar, ndërsa zyrtarët amerikanë thanë se po prisnin miratimin përfundimtar nga presidenti Donald Trump.
Trump nënshkroi dje një urdhër ekzekutiv për të zgjatur pezullimin tarifor SHBA-Kinë.
Sipas marrëveshjes, SHBA-ja do t’i mbajë tarifat e saj ndaj importeve kineze në 30%, ndërsa Kina do të mbajë tarifën prej 10% ndaj mallrave amerikane.
Shtëpia e Bardhë tha se zgjatja e afatit të armëpushimit tregtar do t’i jepte më shumë kohë negociatave rreth korrigjimit të çekuilibrave tregtarë dhe praktikave të padrejta tregtare.
Ajo përmendi një deficit tregtar prej gati 300 miliardë dollarësh (223 miliardë paund) me Kinën në vitin 2024 – më i madhi midis çdo partneri të saj tregtar.
“Bisedimet do të synojnë gjithashtu rritjen e aksesit për eksportuesit amerikanë në Kinë dhe adresimin e çështjeve të sigurisë kombëtare dhe ekonomike”, thuhet në deklaratë.
Në deklaratë, Kina gjithashtu i bëri thirrje SHBA-së të heqë kufizimet e saj “të paarsyeshme” tregtare, dhe të bashkëpunojë për t’u siguruar kompanive nga të dyja palët përfitime dhe të ruajë stabilitetin e prodhimit global të gjysmëpërçuesve.
Discussion about this post