Sot është afati i fundit kur Shtetet e Bashkuara të Amerikës tërhiqën nga Afganistani. Sekretari Amerikan i Shtetit, Antony Blinken tha se të gjithë diplomatët amerikanë janë larguar nga Kabuli dhe se Shtetet e Bashkuara kanë larguar diplomatët nga Afganistani.
Deklarata e Blinken u bë disa orë pasi ushtria amerikanë njoftoi se ka përfunduar procesin e tërheqjes nga Afganistani, pas 20 vjetësh të prezencës së saj në këtë vend. Shtetet e Bashkuara e kanë zhvendosur diplomatët nga Kabuli në Doha të Katarit, ku talebanët e kanë një zyrë politike.
“Ka filluar një kapitull i ri i angazhimit të Amerikës me Afganistanin. Misioni ushtarak ka përfunduar, një mision i ri diplomatik ka filluar”, tha Blinken.
Blinken tha se Shtetet e Bashkuara, në bashkëpunim me aleatët dhe partnerët, do të vazhdojnë përpjekjen për të ndihmuar amerikanët, shtetasit e huaj dhe afganët në rrezik të largohen përmes transportit rrugor ose atij ajror sapo të hapet aeroporti i Kabulit.
Sipas tij, në Afganistan janë më pak se 200 qytetarë amerikanë. Që nga 14 gushti, Shtetet e Bashkuara dhe aleatët e tyre evakuuan më shumë se 122,000 njerëz nga Kabuli.
Shtetet e Bashkuara, sipas tij, do të vazhdojnë të ofrojnë ndihmë humanitare për Afganistanin përmes OKB -së dhe organizatave të tjera.
“Çdo veprim i joni do të bazohet jo në atë që thotë një qeveri e udhëhequr nga talibanët, por në atë që ajo bën për të përmbushur angazhimet e saj”, tha Blinken.
Talebanët po kërkojnë njohje ndërkombëtare dhe u kanë kërkuar misioneve të huaja diplomatike të qëndrojnë në vend, përfshirë Shtetet e Bashkuara dhe aleatët e saj. Shumica e vendeve kanë mbyllur ambasadat e tyre.
