SHBA shton presionet ndaj Ukrainës, duke e kërcënuar se do të ndërpresë aksesin në sistemin satelitor të internetit Starlink, nëse nuk firmos marrëveshjen për mineralet e rralla.
Burime për Reuters thonë se çështja u ngrit të enjten në tavolinën e bisedimeve me dyer të mbyllura mes të dërguarit të SHBA për dialog Keith Kellogg dhe Presidentit Ukrainas Zelensky.
Gjatë takimit, Ukrainës iu tha se do të përballej me mbyllje të afërt të shërbimit Starlink nëse nuk arrinte një marrëveshje për mineralet kritike.
“Humbja e Starlink do të ishte një goditje masive për Ukrainën.” Por, deri më tani, Presidenti Zelensky ka refuzuar kërkesat e administratës Trump për 500 miliardë dollarë pasuri minerale nga Ukraina për të shlyer Uashingtonin për ndihmën e kohës së luftës, duke thënë se SHBA nuk ka ofruar garanci specifike sigurie.
Ndërkohë, Donald Trump deklaroi gjatë ceremonisë së betimit të Howard Lutnickut si Sekretar amerikan i Tregtisë, se Volodymyr Zelensky dhe Presidenti rus, Vladimir Putin, do të duhet “të bëhen bashkë” për t’i dhënë fund luftës gati 3-vjeçare në Ukrainë: “Mendoj se Presidenti Putin dhe Presidenti Zelensky do të duhet të bëhen bashkë. Sepse, a e dini çfarë? Ne duam t’iu japim fund vrasjeve të miliona njerëzve. Mendoj se kemi shanse për të arritur marrëveshjen. Më është dashur të sigurohem që Rusia e kërkon atë”.
Trump ka thënë, po ashtu, se nuk do të shkojë në Moskë më 9 maj për të shënuar përvjetorin e dhënies fund të Luftës së Dytë Botërore, dhe se Shtetet e Bashkuara janë afër nënshkrimit të marrëveshjes për minerale me Ukrainën.
Elon Musk, i cili ka në pronësi shërbimin e internetit satelitor Starlink, në vitin 2022 nxitoi të ndihmonte Ukrainën duke vënë në funksion mijëra terminale Starlink që zëvendësuan shërbimet e komunikimit të shkatërruara nga Rusia pas pushtimit. I përshëndetur si një hero në Ukrainë, Musk më vonë kufizoi aksesin duke kritikuar trajtimin e luftës nga Kievi.
Discussion about this post