SHBA kushtëzoi “Open Balkan”, Rama: Duhet të ecim përpara!

Në takimin e sotëm të “Open Balkan” që u zhvillua online, mori pjesë edhe i dërguari i SHBA-së për Ballkanin, Gabriel Escobar, i cili deklaroi se nisma do të ketë sukses vetëm nëse të gjashtë vendet e rajonit do të bëhen pjesë.

“Mbështetja për “Open Ballkan” do të bëhet në bazë të kushteve që nisma të jetë hapur për të gjithë për anëtarësim të barabartë dhe jo shpërqendrim nga aspiratat evropiane. Pa të 6-ta vendet nuk mund të ketë sukses” deklaroi Escobar.

Si një kundërpërgjigje ndaj tij, Rama deklaroi se nisma do të vazhdojë edhe pa pjesëmarrjen e të gjitha vendeve, pasi nuk mund t’i bindin.

“Nuk varet nga ne të bindim dikë që “Open Ballkan” është i hapur. Duhet të ecim përpara, nuk mund të presim. Varet nga gjithkush që të marrë vendimet e veta. Ne thjeshtë po zbatojmë procesin e Berlinit. Gjithkush të vendosë në mënyrë të pavarur çfarë do për vendin e vet”, tha Rama.

Në takim nuk munguan kritikat ndaj BE-së, pasi sipas Ramës, kjo e fundit duhet të inkurajojë vendet e tjera që të përfshihen.