Shtetet e Bashkuara të Amerikës do të financojnë projekte duke përfshirë pajisjet e mbikqyrjes dhe monitorimit për të forcuar kufijtë e Ukrainës me Rusinë dhe Bjellorusinë, në mes të përshkallëzimit të vazhdueshëm me Moskën, tha të martën shërbimi kufitar i Ukrainës. Kievi akuzon Moskën se ka grumbulluar dhjetëra mijëra trupa pranë kufijve të saj në përgatitje për një ofensivë të mundshme.
Rusia mohon planifikimin e ndonjë sulmi, por akuzon Ukrainën dhe Shtetet e Bashkuara për sjellje destabilizuese dhe ka kërkuar garanci sigurie kundër zgjerimit të NATO-s drejt lindjes. Shërbimi kufitar tha në një deklaratë se projektet me vlerë 20 milionë dollarë përfshinin blerjen e sistemeve të regjistrimit të videove dhe dronëve, si dhe pajisje mbrojtëse personale për rojet kufitare.
Ukraina, e cila kërkon t’i bashkohet Organizatës së Traktatit të Atlantikut të Veriut (NATO), që nga viti 2018 ka marrë gjithashtu një sërë ngarkesash me municione amerikane dhe raketa Javelin, duke shkaktuar kritika nga Moska.
Discussion about this post