Pentagoni njoftoi se ka filluar tërheqja e trupave amerikane, pas një operacioni për më shumë se dy javë në përpjekje për të nxjerrë nga Afganistani shtetasit amerikanë dhe aleatët e tyre afganë të cilëve iu rrezikohet jeta nën drejtimin e talebanëve.
Nga 5800 që u dërguan për misionin e evakuimit, një zyrtar amerikan i tha agjencisë së lajmeve Reuters se kishte më pak se 4000 trupa të mbetura në aeroport. Zëdhënësi i Pentagonit John Kirby më vonë u konfirmoi gazetarëve se tërheqja kishte filluar, por nuk pranoi të jepte një numër se sa forca amerikane ishin ende në Kabul.Ndërsa po largohen nga Afganistani, SHBA po ashtu njoftoi se kishte vrarë dy militantë të Shtetit Islamik.
Për këtë sulm reaguan dhe talebanët.
“Amerikanët duhet të na kishin informuar para se të kryenin sulmin ajror. Ishte një sulm i qartë në territorin afgan”, tha një zëdhënës i talebanëve për Reuters.
Zabihullah Mujahid, zëdhënësi i Talebanëve tha gjithashtu se do të marrin aeroportin “shumë shpejt”, pasi forcat amerikane të tërhiqen dhe të jetë formuar qeveria e re në ditët në vijim. Qeveria dhe ushtria afgane e mbështetur nga Perëndimi u rrëzuan brenda pak ditësh, ndërsa militantët islamikë hynë në kryeqytetin e vendit më 15 gusht.
