Administrata amerikane, përmes Departamentit të Sigurisë Kombëtare (DHS) dhe agjentëve federalë të Shërbimit të Imigracionit dhe Doganave (ICE), ka publikuar një raport të ri ku renditen dhjetëra persona të arrestuar për shkelje të ligjeve të imigracionit dhe precedentë të rëndë penalë. Në këtë listë, e cila përfshin emrat, akuzat dhe vendet e arrestimit, rezultojnë edhe gjashtë shtetas shqiptarë dhe kosovarë të cilët klasifikohen si persona me rrezikshmëri të lartë për komunitetin.
Sipas raportit të DHS, këta individë janë ndaluar si pjesë e një operacioni të gjerë federal, që synon identifikimin dhe largimin nga SHBA të personave me rekorde kriminale, të paligjshëm ose që konsiderohen kërcënim për sigurinë publike.
Të arrestuarit me origjinë shqiptare të përfshirë në listë janë:
• Vasil Vukaj, i shpallur fajtor për vrasje, arrestuar në Kaliforni.
• Florjan Delija, i dënuar për sulm fizik, ndaluar në Nju Jork.
• Adush Muçaj, me precedent për dhunë fizike, arrestuar në Utah.
• Marian Makai, i dënuar për vjedhje, sjellje të çrregullt dhe kërcënime terroriste, arrestuar në Kaliforni.
• Nikollë Lleshaj, nga Kosova, i ndaluar për sulm dhe përfshirje në aktivitete kriminale.
• Besart Hoxha, nga Kosova, i hetuar për përfshirje në organizata kriminale sipas ligjit RICO.
Zyrtarët e DHS kanë deklaruar se operacionet e fundit janë pjesë e një strategjie të re federale për të “prioritizuar largimin e individëve me historikun më të rëndë kriminal”. Nënsekretarja Noem theksoi se agjentët e ICE po veprojnë në gjithë territorin amerikan, duke marrë në shënjestër personat që përbëjnë rrezik të drejtpërdrejtë për rendin dhe sigurinë publike.
Raporti është publikuar pak ditë pas lançimit të databazës së re “Worst of the Worst”, një faqe zyrtare ku DHS liston publikisht personat që konsiderohen më problematikë nga drejtësia amerikane. Qëllimi i kësaj nisme, sipas autoriteteve, është transparenca dhe informimi i publikut për të arrestuarit që kanë shkelur ligjet e imigracionit dhe penalitetet e rënda.
Përfshirja e shqiptarëve dhe kosovarëve në listën e fundit ka tërhequr vëmendje edhe brenda komunitetit shqiptar në SHBA, duke ngritur shqetësime për imazhin e diasporës. Ndërkohë, autoritetet amerikane kanë paralajmëruar se operacionet e kontrollit dhe dëbimeve do të vijojnë me intensitet të lartë në javët në vijim.
Discussion about this post