Partia Demokratike ka reaguar pas lajmeve të bëra publike, sipas të cilave, Departamenti Amerikan i Shtetit (DASH) ka ndryshuar qëndrim sa i përket statusit të udhëtimit të liderit historik të opozitës, Sali Berisha, duke hequr pengesat për hyrjen e tij në Shtetet e Bashkuara. Ky zhvillim, i raportuar fillimisht nga gazetari amerikan Marc Caputo duke cituar burime nga DASH, ka nxitur një deklaratë nga selia blu.
Në reagimin e saj zyrtar, Partia Demokratike e përshëndet këtë qëndrim të Departamentit të Shtetit, duke e cilësuar si “të drejtë dhe kthim të legalitetit”. Sipas PD-së, ky legalitet ishte “marrë peng nga administrata Biden me lobimin e George Soros dhe Edi Ramës”.
Partia Demokratike thekson se “e drejta ka vonuar, por është vënë në vend, falë administratës së Presidentit Trump, fitorja e të cilit i ka shërbyer botës së lirë”. Në deklaratë përmendet edhe fjala e Zëvendëspresidentit Vance në Mynih si një përsëritje e këtij mesazhi.
Më tej, PD-ja sqaron se beteja e zhvilluar nuk ka qenë thjesht “për lirinë e Sali Berishës për të udhëtuar”, por më tepër “lufta e tij dhe demokratëve për të drejtën e shqiptarëve që opozitën të mos e emërojë pushteti”.
Në emër të kryetarit të saj, Sali Berisha, 26 partive të koalicionit dhe demokratëve, Partia Demokratike ka falënderuar Departamentin e Shtetit “për qëndrimin e drejtë dhe parimor”.
Deklarata e PD-së bën edhe një paralele me situatën politike në SHBA, duke argumentuar se “Amerika nuk është e panjohur me këtë skenar, siç e ka dëshmuar katër vitet e fundit në gjuetinë e shtrigave kundër Presidentit Trump”.
Në përmbyllje të reagimit, Partia Demokratike citon fjalët e ish-Sekretarit Amerikan të Shtetit, Republikanit James Baker, i cili 34 vite më parë në Sheshin “Skënderbej” deklaroi: “Liria funksionon”. “Ajo funksionoi edhe sot,” përfundon deklarata e Partisë Demokratike, duke e interpretuar zhvillimin e fundit si një konfirmim të këtij parimi.
Ky reagim vjen pas raportimeve se Departamenti i Shtetit ka deklaruar, sipas gazetarit Caputo, se SHBA “nuk do të lejojnë që marrëdhëniet me Shqipërinë të mbahen peng nga vendime të politizuara të epokës së Biden” dhe se mund të lehtësojnë udhëtimin e individëve të caktuar në SHBA në përputhje me detyrimet ndërkombëtare dhe interesat kombëtare amerikane.
Lexo edhe:
Shtetet e Bashkuara zhbëjnë ‘non gratën’, Berisha rifiton hyrjen në Amerikë
Discussion about this post