Tiranë – Ambasada e Shteteve të Bashkuara në Tiranë ka mirëpritur këtë javë Ndihmës Drejtorin e ICITAP në Departamentin Amerikan të Drejtësisë, Stephen Fields, në një vizitë zyrtare që zgjati nga 19 deri më 23 maj. Vizita u fokusua në forcimin e partneritetit me institucionet shqiptare të zbatimit të ligjit dhe mbështetjen për përpjekjet kundër krimit të organizuar dhe emigracionit të paligjshëm.
Gjatë qëndrimit në Tiranë, z. Fields u takua me të Ngarkuarën me Punë të Ambasadës, Nancy VanHorn, dhe zhvilloi takime me zyrtarë të lartë shqiptarë si Ministri i Brendshëm Ervin Hoxha, kreu i SPAK Altin Dumani, drejtori i Policisë së Shtetit Ilir Proda, kreu i AMP Florian Sulejmani dhe drejtori i Burgjeve Klevis Qose.
Në kuadër të kësaj vizite, SHBA dorëzoi 340,000 dollarë në pajisje të reja për sistemin penitenciar shqiptar, një ndihmë që vjen përmes ICITAP dhe Byrosë kundër Terrorizmit dhe programit INL të Departamentit të Shtetit.
Vizita u mbyll me një ngjarje të veçantë në Akademinë e Sigurisë, ku u prezantua Çmimi i Ekselencës dhe akreditimi i parë ndërkombëtar nga IADLEST – një moment historik për arsimin dhe trajnimin në fushën e sigurisë në Shqipëri.
Ky zhvillim vjen në një kohë kur bashkëpunimi mes SHBA dhe Shqipërisë në fushën e drejtësisë dhe sigurisë po thellohet gjithnjë e më shumë, duke i dhënë prioritet luftës kundër karteleve dhe krimit të organizuar ndërkombëtar.
Discussion about this post