Testimi i armëve bërthamore i urdhëruar nga presidenti i SHBA-së Donald Trump nuk do të përfshijë shpërthime bërthamore, tha dje në mbrëmje, sekretari i Energjisë, Chris Wright.
“Mendoj se testet për të cilat po flasim tani janë teste sistemi”, tha Wright për “Fox News” në një intervistë.
“Këto nuk janë shpërthime bërthamore. Këto janë ato që ne i quajmë shpërthime jo të rëndësishme”, tha ai.
“Testet e planifikuara përfshijnë të gjitha pjesët e tjera të një arme bërthamore për t’u siguruar që ato japin gjeometrinë e duhur dhe ato krijojnë shpërthimin bërthamor”, shtoi ai.
Trump shkaktoi shqetësime disa ditë më parë duke njoftuar rifillimin e menjëhershëm të testimit të armëve bërthamore, pa sqaruar se çfarë saktësisht do të testohej.
Kjo la të hapur diskutimet nëse shpërthimet nëntokësore mund të përfshiheshin. Trump e justifikoi vendimin duke thënë se edhe vende të tjera po kryenin teste.
Wright tha se modernizimi i rezervave bërthamore të SHBA-së ishte një “prioritet i rëndësishëm”.
“Shumë nga armët tona janë shumë të vjetra”, tha ai, duke shtuar se arsenali duhej të mbahej modern dhe i azhurnuar për të ruajtur lidershipin global.
“Kjo, ishte e vetmja mënyrë për të garantuar paqen jashtë vendit dhe prosperitetin në vend”, shtoi ai.
Departamenti i Energjisë mbikëqyr shumë aspekte të arsenalit bërthamor të SHBA-së, përfshirë edhe përmes Administratës Kombëtare të Sigurisë Bërthamore (NNSA).
SHBA-ja zhvilloi për herë të fundit një test të armëve bërthamore në vitin 1992.
Së bashku me Rusinë dhe Kinën, deri më tani i janë përmbajtur një moratoriumi 10-vjeçar për shpërthimet bërthamore nëntokësore.
Uashingtoni ka një program të gjerë për të siguruar besueshmërinë e arsenalit të tij bërthamor.
Ai përfshin simulime kompjuterike, teste që përdorin materiale bërthamore që nuk shkaktojnë reaksione zinxhir dhe prova të teknologjive të raketave dhe kokave luftarake.
Sipas disa ekspertëve, masa të tilla i bëjnë testet bërthamore të panevojshme.
Discussion about this post