Një ditë pas “premtimit” rus për zvogëlim të sulmeve në Ukrainë, Shtetet e Bashkuara të Amerikës i kanë bërë thirrje qytetarëve amerikanë të mos udhëtojnë drejt Rusisë dhe në rast se jetojnë atje të largohen urgjentisht nga vendi.
Zyrtarët bëjnë me dije se ushtria ruse ka arrestuar edhe shtetas amerikanë që ndodhen në Ukrainë si dhe qytetarë në tentativë e sipër për tu evakuuar nga vendet e pushtuara nga Rusia, shkruan BBC.
“Nëse dëshironi të largoheni nga Rusia, duhet të bëni marrëveshje sa më shpejt të jetë e mundur”, thuhet në njoftimin e SHBA-ve.
Forcat ruse kanë sulmuar në orët e para të mëngjesit, një tjetër qytet të Ukrainës, Lysychansk, sipas skynews. “Janë dëmtuar shumë ndërtesa, ndërkohë ende nuk ka të raportuar për viktima,” tha guvernatori rajonal i Luhansk, Serhiy Gaidai.
Ministria e Mbrojtjes e Mbretërisë së Bashkuar tha se njësitë ruse po detyrohen të kthehen në Rusi dhe Bjellorusi për t’u riorganizuar dhe rifurnizuar dhe paralajmëroi se reduktimi i forcave në terren mund të nënkuptojë më shumë sulme raketore.
Discussion about this post