Në ditën e Kushtetutës së Shteteve të Bashkuara të Amerikës, e ngarkuara me Punë në Tiranë Nancy Van Horn, përcolli mesazhin ku theksoi rëndësinë e shtetit të së drejtës.
Van Horn: “Kushtetutat ndërtohen mbi parime thelbësore për një demokraci funksionale: mbrojtja e të drejtave individuale, ndarja e pushteteve, liria e fjalës dhe sundimi i ligjit. Këto parime nuk janë thjesht ideale abstrakte; ato janë themeli i besimit midis qeverive dhe popujve të tyre. Ato sigurojnë që drejtësia të zbatohet në mënyrë të drejtë, që pushteti të jetë i balancuar dhe të drejtat e çdo individi të respektohen.”
Aktorët kryesorë që garantojnë parimet e Kushtetutës sipas diplomates amerikane janë përfaqësuesit e drejtësisë, media si dhe shoqëria civile.
Van Horn: “Gjyqtarët, prokurorët, anëtarët e shoqërisë civile dhe një shtyp i lirë janë rojtarët e të drejtave të çdo qytetari shqiptar. Ju keni fuqinë të siguroni që drejtësia të mos jetë thjesht një fjalë, por një realitet për të gjithë shqiptarët. Keni përgjegjësinë të mbroni drejtësinë, transparencën dhe llogaridhënien. Dhe keni mundësinë të forconi besimin midis njerëzve dhe institucioneve që i shërbejnë atyre.”
Teksa shprehu mbështetjen ndaj tyre, në mesazhin e saj Van Horn u bëri thirrje që të mos ndikohen nga faktorë të jashtëm dhe të qëndrojnë rezistent ndaj korrupsionit.
Van Horn: “Kjo punë kërkon guxim – guximin për të marrë vendime të vështira, për të rezistuar ndaj korrupsionit dhe për të qëndruar të palëkundur përballë trysnisë. Ndërsa vazhdoni punën tuaj jetike, mos harroni se një kushtetutë është më shumë se një dokument ligjor. Është një premtim i gjallë për të mbrojtur të drejtat, për të mbështetur drejtësinë dhe për të ndërtuar një të ardhme më të mirë për të gjithë.” Në fund të mesazhit të saj, Van Horn u shpreh se të gjithë duhet të gjejmë guximin për të mbështetur idealet që e bëjnë të mundur demokracinë.
Discussion about this post