Shtetet e Bashkuara të Amerikës ia kanë vënë veton rezolutës së Këshillit të Sigurimit të Organizatës së Kombeve të Bashkuara për “armëpushim të menjëhershëm humanitar” në luftën midis Izraelit dhe grupit militant palestinez Hamas në Gaza.
13 anëtarët e Këshillit të Sigurimit votuan në favor të një projekt-rezolute të shkurtër, të paraqitur nga Emiratet e Bashkuara Arabe, ndërsa Britania abstenoi. Votimi erdhi pasi sekretari i Përgjithshëm i OKB-së, Antonio Guterres, bëri lëvizje të rrallë të mërkurën për të paralajmëruar zyrtarisht këshillin prej 15 anëtarësh për një kërcënim global nga lufta e gjatë dymujore mes Izraelit dhe Hamasit.
“Nuk është çështje rreth izolimit. Është një çështje rreth asaj që ne mendojmë se është më e mira për t’i dhënë fund këtij konflikti sa më shpejt të jetë e mundur dhe gjithashtu për të ndihmuar në lehtësimin e më shumë ndihmave humanitare që shkojnë në Gaza. Ne nuk mund të këputim gishtat dhe konflikti ndalet. Kjo është një situatë shumë, shumë e vështirë”, u tha gazetarëve zëvendësambasadori i SHBA-së në OKB, Robert Wood, përpara votimit.
Shtetet e Bashkuara dhe Izraeli kundërshtojnë armëpushimin sepse besojnë se nga ai do të përfitonte vetëm Hamasi. Uashingtoni në vend të kësaj mbështet pauzat në luftimet për të mbrojtur civilët dhe për të lejuar lirimin e pengjeve të marra nga Hamasi. Lufta mes Izraelit dhe Hamasit nisi më 7 tetor dhe deri tash ka lënë mijëra viktima, veçanërisht në anën e Gazës.
Discussion about this post