SHÇBA ka arrestuar ditën e sotme një agjent krimesh që ushtronte detyrën pranë komisariatit të Policisë numër 6 në Tiranë.
Agjenti me inicialet L.V, 46 vjeç, dyshohet se ka kryer dy vepra penale, e para ajo e korrupsionit dhe e dyta ajo e shpërdorimit të detyrës. Ende nuk ka një komunikatë zyrtare për episodet për të cilat është arrestuar punonjësi i Policisë si dhe nuk dihet identiteti i tij.
Strukturat e policisë duket se janë përqendruar në realizimin e objektivave të vendosura nga kryeministri Edi Rama. 100 ditë është afati i caktuar nga Rama për të pastruar policinë nga radhët e të inkriminuarve dhe SHÇBA po zbaton detyrat.
Para një jave, dega e Tiranës arrestoi efektivin e RENEA-s, Rael Luli, i akuzuar si kreu i një grupi të shpërndarjes së drogës në disa zona në kryeqytet.
