Drejtoria Rajonale e SHÇBA-së Fier ka arrestuar disa punonjës policie të zinxhirit komandues në Mallakastër për veprat penale të “Kultivimit të bimëve narkotike” dhe “Shpërdorimit të detyrës.”
Sipas njoftimit të SHÇBA u caktua masa arrest me burg për:
-Komisar E.K., me detyrë Shef i Seksionit të Krimeve pranë Komisariatit të Policisë Mallakastër,
-N/Komisar E.V., me detyrë Specialist i Krimeve pranë Komisariatit të Policisë Mallakastër,
-Inspektor E.B., me detyrë Ndihmës Specialist në Seksionin e Teknologjisë dhe të Përgjimit në DVP Fier,
-Inspektor E.L., me detyrë SPZ pranë Komisariatit të Policisë Mallakastër,
-Inspektor O.K., me detyrën e Laborantit Kriminalistik pranë DVP Fier.
Gjithashtu, në kuadër të këtij procedimi penal, Gjykata e Shkallës së Parë Fier ka caktuar masat e sigurisë “Detyrim për t’u paraqitur në policinë gjyqësore” edhe për punonjësit e mëposhtëm të policisë:
– Komisar G.P., në detyrën e ish-Shefit të Komisariatit të Policisë Mallakastër
-Inspektor Y. K., me detyrë SPZ pranë Komisariatit të Policisë Mallakastër
-Inspektor I.B., me detyrë SPZ pranë Komisariatit të Policisë Mallakastër
Masat e sigurisë për këtë procedim penal janë nxjerrë në vijim të procedimit penal për veprat penale të “Kultivimit të bimëve narkotike” dhe “Shpërdorimit të detyrës”, ku pas hetimeve të kryera, në afërsi të Urës së lumit Vjosë, në Poçem të Mallakastrës, u evidentuan disa parcela të kultivuara me bimë narkotike, ngjarje për të cilën më herët janë arrestuar në flagrancë 3 shtetas.
“Këta punonjës policie dyshohet se kanë shpërdoruar detyrën gjatë periudhës qershor – shtator 2021 duke lejuar, apo favorizuar veprimtarinë kriminale të disa shtetasve të arrestuar më parë nga Prokuroria e Rrethit Fier për kultivim të bimëve narkotike.”
Nga hetimi i këtij procedimi penal është bërë e mundur sigurimi i provave ku janë gjetur disa parcela në vende të ndryshme të hapura dhe të mbjella në disa sipërfaqe të njësisë administrative Poçem, Mallakastër.
Discussion about this post