Kryetari i Partisë Mundësia, Agron Shehaj, garantoi sërish votuesit e Partisë Mundësia se votat e tyre do të numërohen të gjitha, pasi në çdo tavolinë numërimi do të jenë vëzhguesit e “Mundësisë”.
“Budallallëku tjetër që dëgjoj është se do na vjedhin votat. Po si do na i vjedhin, do marrin kutinë e do ikin me vrap, apo do fshijë “X” te Partia Mundësia e do e çojnë në parti tjetër.
Nuk ka asnjë shans që votat e Partisë mundësia të vidhen nga dikush. Janë gënjeshtra.
Sot kemi një listë me mbi 1000 vëzhgues që do jenë në çdo tavolinë numërimi. Nuk ka asnjë shanc që vota e Partisë Mundësia të preket”, deklaroi Shehaj nga Paskuqani.
Shehaj deklaroi se Mundësia do të ketë një grup parlamentar që do të përfaqësojnë qytetarët e ndershëm të Shqipërisë.
“Për herë të parë në historinë e Shqipërisë, një parti e re politike do hyjë në Parlament jo vetëm pa ndihmën e partive të mëdha, por duke i patur të gjitha partitë e tjera kundër. Pavarësisht sulmeve, sot jemi këtu dhe nesër do kemi një grup parlamentar që do përfaqësojnë qytetarët e ndershëm të këtij vendi. Nuk ka votë më me vlerë se vota për Partinë Mundësia, pasi është e vetmja votë që përfaqëson interesin e qytetarëve. Nuk duhet t’i dëgjojmë, duhet të vazhdojmë përpara. Do të habiten zgjedhjet e ardhshme, por do habiten edhe më shumë kur ne të vazhdojmë të ngulim këmbë. Kjo është e vërteta, dhe prandaj janë të shqetësuar”, u shpreh Shehaj.
Partia Mundësia garon për herë të parë në zgjedhjet e 11 majit dhe mban numrin 10.
Discussion about this post