Kreu i Partisë Mundësia, Agron Shehaj është përjashtuar për 30 ditë nga Kuvendi, pas përplasjeve që pati me ministrin e Financave Petrit Malaj. Gjatë seancës së shkuar plenare ministri Malaj i përmendi Shehajt kompanitë e tij private, duke thënë se “Tani do merremi ne me ty”.
Pas kësaj situata agravoi dhe Shehaj iu drejtua Malajt me një gjuhë ofenduese dhe tone të ashpra, duke i thënë: “Si në kohën e komunizmit, merreni me familjen time, po s’ju vjen turp fare? Po një qytetari të thjeshtë, çfarë i bën ti more maskara? Çfarë i bën? Më thuaj? I dërgon policinë? Më kërcënon haptas, si guxon? Si guxon, maskara. Je maskara, je një maskara, plaço, hajdut.”
Kërkesa për përjashimin e tij u bë nga Kreu i Grupit Parlametar të PS-së, Taulant Balla dhe një grupi deputetësh socialistë. Sekretariati i Etikës, i drejtuar nga Ulsi Manja, vendosi ta dënojë atë me masën maksimale, duke e përjashtuar atë me 30 ditë nga punimet e Kuvendit.
Discussion about this post