Kryetari i Partisë Mundësia, Agron Shehaj, ka reaguar ashpër ndaj deklaratave të Kryeministrit Edi Rama, duke e akuzuar këtë të fundit se po kërcënon drejtësinë.
“Plasi lufta. Drejtësia nga një anë, të korruptuarit nga ana tjetër. Shikoni se si Edi Rama kërcënon haptas drejtësinë: ‘Dhe të mos bëjnë gabim të vijnë të kërkojnë telefonin tim se ai boll i ka, ka mbledhur gjithë telefonat e Shqipërisë’”, u shpreh Shehaj.
Sipas tij, përballja mes drejtësisë dhe korrupsionit ka hyrë në një fazë vendimtare, ku të akuzuarit për korrupsion do të përpiqen të sulmojnë sistemin e drejtësisë për të shpëtuar veten.
“Do të bëhen të gjithë bashkë. Do t’i vërsulen drejtësisë. Ka ardhur momenti të vendosim me kë jemi. Jemi me drejtësinë, me moralin, apo me të korruptuarit? Jemi me hajdutët që duan të vazhdojnë të marrin pushtetin?”, theksoi ai.
Shehaj i bëri thirrje qytetarëve që të mos dorëzohen, por të reagojnë për të mbështetur ata që punojnë me ndershmëri dhe për të refuzuar ata që, sipas tij, kanë mbijetuar vetëm nëpërmjet korrupsionit dhe pazareve politike. “Nuk janë aq të pushtetshëm sa duan të tregohen. Pushteti është në duart tuaja. E vendosni ju me votën tuaj se kush do ta qeverisë këtë vend, se kush do ta fitojë këtë betejë”, përfundoi ai.
Discussion about this post