Kryetari i Partisë Mundësia, Agron Shehaj i është përgjigjur Sali Berishës, i cili e akuzoi mbrëmjen e djeshme se ka vjedhur databazën e PD-së.
Sipas Shehajt, kur Lulzim Basha mori vulën dhe Berisha mbeti pa parti, ishte ai që i dha bazën e të dhënave Rithemelimit të Sali Berishës. Ai thotë se me databazën që i ka dhënë, Rithemelimi e ka përdorur për të organizuar Kuvendin e 11 dhjetorit në stadium dhe vazhdon ta përdorë edhe sot.
“Kush më njeh e di shumë mirë që unë nuk vjedh. Kam krijuar nga hiçi kompani në Shqipëri dhe jashtë Shqipërisë, pa tendera, pa lidhje politike, pa ndihmën e shtetit. Kam krijuar databaza, platforma. Kam investuar në teknologji dhe kështu i kam rritur bizneset e mia. Por ndoshta doktor Berisha nuk e mban mend, por kur mbeti pa parti, pa vulë, pa asnjë lloj informacioni, isha unë që i dhashë databazën. Dhe me atë databazë kanë bërë Kuvendin e famshëm të stadiumit. Besoj se një faleminderit do të kishte mjaftuar.” – tha Shehaj në video-reagimin e tij në rrjete sociale.
Discussion about this post