Tirana ia ka dalë të mposhtë Teutën në sfidën e javës së 14-të të Superligës Shqiptare me rezultatin 2-1 në ‘Air Albania’.
Të dyja skuadrat erdhën nga rezultate negative në këtë përballje por në fund të saj do të ishte Tirana e Orges Shehit që do të shkëlqente në këtë sfidë.
Kryeqytetasit arritën të zhbllokojnë këtë ndeshje në minutën e 23’ me Einur Totre, duke shtangur me një gol nga distanca portierin Qirko.
Minuta e 45’ do të kërkonte praninë e sistemit VAR, ku Ivanoviç do të kryente kundrejt Seferit një ndërhyrje të rrezikshme në zonën e rreptësisë, ku kërkohet një penallti, por kryesori i takimit e quan të panevojshme dhe mbyll pjesën e parë me shifrat 1-0 në favor të kryeqytetasve.
Pjesa e dytë nisi me Teutën në kërkim të golit të barazimit ku në minutën e 53’ do të krijonte një rast shumë të mirë shënimi me Pepi Gjergiev që godet topin me kokë në drejtim të portës së Bekajt, por nuk mundet të gjejë kuadratin.
Tirana do të tregohej e ‘hidhur’ për miqtë në minutën e 68’ ku Xhixha, autori i golit të parë do të shërbente për Seferin, që finalizon në portën e Qirkos, duke i dërguar shifrat e takimit në 2-0.
Gruda do të hapte llogaritë e këtij takimi, ku në minutën e 84’ do të shënonte golin për Teutën që do të ngushtonte shifrat në fushë por me Teutën që nuk kishte mundësi të bënte më shumë në këtë takim, që përfundon me shifrat 2-1 në favor të Tiranës.
Discussion about this post