Partitë e vogla opozitare janë bërë bashkë për të mbështetur kandidatin e koalicionit “Bashkë Fitojmë” për bashkinë e Durrësit, Igli Cara. Kryetari i LZHK-së, Dashamir Shehi në fjalën e tij kërkoi nga të gjithë qytetarët që të votojnë, Igli Carën, pasi ai është e ardhmja e politikës.
Sipas Shehit, Durrësi ka nevojë për njerëz që punojnë dhe jo për ata që Durrësin duan ta përdorin për të ndërtuar pallate, duke i marrë Portin. “Unë gjykoj se zotërinj si Igli, janë në një farë mënyrë e ardhmja e politikës. A do shkojmë në zgjedhje politike pas dy vitesh? Sigurisht do shkojmë me disa fytyra të reja. Prandaj unë do ju ftoja të votojmë Iglin për një Durrës ndryshe. Durrësin e kanë lakmi, të gjithë duan ta marrin.
Kjo qeveri ka bërë edhe disa megaprojekte. Për veshin e qytetarit edhe kur është i painformuar, i duket sikur po i vjen Dubai këtu.
Nëse donin të bënin diçka për Durrësin nuk merrnin portin këtu. Te kodrat e Durrësit ka vend për mijëra apartamente. Por këta e duan këtu në mes të Durrësit.
Kjo tregon që ky është një biznes komercial, që bëhen në botë, por Durrësi është gjë tjetër. Nuk kemi nevojë për pallate, por për zhvillim afatgjatë.
Votoni cilin të doni për partitë, por Igli Carën për Durrësin.
Durrësi meriton më shumë, meriton zotin Cara një qytetar të ndershëm dhe punëtor. Se ky vend mund të bëhet vetëm me ata që punojnë. Ata që bëjnë llafe kemi kohë që i dëgjojmë”, tha Shehi.
Discussion about this post