Tirana kryeson e qetë Superioren dhe nesër bardheblutë kanë në program një ndeshje tjetër, ndaj Egnatias që po lufton të sigurojë qëndrimin në kategori. Trajneri Orges Shehi doli në konferencë për mediat dhe i vlerëson maksimalisht rrogozhinasit.
“Përballemi me një skuadër që ka bërë mirë. Edhe më përpara ka qenë me grup lojtarësh cilësorë. Çdo skuadër ka objektivat e veta dhe gjatë rrugës objektivat ndryshojnë. Më parë objektivi i tyre ishte mbijetesa.
Tani mbase synimi i tyre është shmangja e zonës që mund t’i dërgojë në ‘Play-Out’. Mendoj se do të jetë një ndeshje e vështirë, pasi do të luajmë në fushën e tyre. Do të përballemi me një skuadër që është për t’u respektuar dhe do të tregojmë maksimumin”.
“Këto dy javët e fundit është kjo vështirësia e karikimit të skuadrës. Distanca është relativisht e madhe me ndjekësit tanë. Gara tani është me veten tonë në këto momente dhe duhet të jemi sa më shumë kërkues, që të shfaqim më të mirën tonë. Kundërshtari ka cilësi dhe ne duhet të jemi me përqendrim maksimal. Nesër mendoj se do të hedh formacionin më të mirë të mundshëm”.
“Kemi bërë një kampionat të mirë, kemi qenë gjithmonë në vazhdimësi. Mendoj se te futbolli, pjesa më e rëndësishme është vazhdimësia dhe skuadra në çdo fazë është shfaqur mirë. Ky është fryt i punës së madhe që është bërë. Jemi të kënaqur me këtë ecuri, por duhet të përmirësohemi edhe më shumë, të kemi një fytyrë, të jemi gjithmonë ai ekip që kemi qenë”, tha Shehi.
Discussion about this post