Shembet për herë të dytë brenda vitit ura në Delvinë

Banorët e fshatit Vane të Delvinës po rrezikon jetën teksa kalon nën urën që u shemb tre ditë më parë.

500 banorë kanë mbetur të izoluar. Kjo urë i lidh me rrugën nacionale Delvinë-Sarandë. Tani që lumi nuk ka shumë ujë prej mungesës së rrëshjeve e kanë më të lehtë të dalin e hyjnë në fshat.

Është hera e dytë gjatë këtij viti, që ura shembet për shkak të punimeve të dobëta.

Banorët ironizojnë. “Ta heqin dhe këtë që ka mbetur ta japin për skrab t’ja japin lekët qeverisë se mos janë në borxh me botën”, tha një prej tyre.

“Me çdo kalojmë të marrim ndonjë avion të kalojmë siç lëviz kryeministri”, shtoi një tjetër.

Ata nuk po shesin dot as prodhimet bujqësore dhe blegtorale në qytet. Kush ka furgona apo mjete të larta mund ti transportojë përmes lumit.

E pyetur nga mediat, Kryetarja e Bashkisë Delvinë, Majlinda Qilimi, tha se kanë vënë në djeni preferkturën dhe janë në pritje të asistencës teknike për riparimin e urës nga Ministria e Mbrojtjes.