Fjona Çela
Alennia Cerri është një nga vogëlushet e 5-majit. Sot Alennia mbushi 5 vjeç, por nuk mundi të festojë në shtëpinë e saj si bashkëmoshatarët. Data 22 shkurt 2022 do të mbetet gjatë në memorien e saj dhe të familjarëve, si një ditë trishtimi, pasi mori si “dhuratë” shembjen e shtëpisë ku ka lindur, është rritur dhe ka përjetuar shumë kujtime.
Si çdo fëmijë, Alennia ka ëndrrat e saj. Ajo shkon në kopësht, i pëlqen të kërcejë e të këndojë, di shumë vjersha, njeh mirë shkronjat e numrat, dhe i pëlqen edhe të kryejë veprime matematikore. Të gjitha këto aktivitete, Alennia ishte mësuar t’i kryente në shtëpinë e saj, që tashmë nuk e ka më. Edhe pse është në moshë të vogël, e ka kuptuar shumë mirë situatën. Prindërit i kanë treguar se do të lëvizin nga shtëpia, sepse aty do të bëhen pallate, dhe ajo mendon se shtëpia e saj do të jetë në një nga pallatet e reja që do të ndërtohen në këtë zonë. Prindërit thonë mes dhimbjesh se nuk i kanë treguar që nuk do të marrin asgjë, pasi shtëpia ku kanë banuar nuk figuron në emrin e tyre.
“Nëse dikush është përgjegjës për këtë situatë, janë pikërisht këta që kanë 31 vite që na qeverisin në këtë mënyrë, duke i lënë prindërit tanë që të ndërtojnë aty, dhe tani shembjet duhet t’i vuajnë fëmijët dhe nipërit e tyre. Vajza e madhe më kërkoi në telefon që t’i bëja një video kur të prishej shtëpia. Një ditë para se të largoheshin që këtu, e madhja shkoi rrotull shtëpisë dhe e pashë që po qante, edhe pse është fëmijë që nuk e shpreh, e pashë që po qante fshehurazi. Sigurisht ajo ka qenë streha e tyre. Ata mund të na kenë vrarë strehën, por nuk na vrasin dot ndjenjat, mendimet dhe të ardhmen tonë”- shprehet e ëma e Alennias, Alsida Hasi.
E megjithatë, vogëlushja Alennia nuk i humb shpresat. Ajo nuk ishte aty në momentin kur u kryen shembjet, por në dorezën e derës së shtëpisë, ka varur një lule dhe ka shënuar emrin e saj.
“Vajzën e kam çuar që mbrëmë tek prindërit e mi. Ajo e di shumë mirë se çfarë do ndodhë, sepse më pyeti edhe mbrëmë në telefon nëse e kanë prishur apo jo shtëpinë, por sigurisht do ta gjejmë kohën për t’ia festuar datëlindjen. Por në cilin vend të botës mund t’i bëhet një fëmije një dhuratë kaq e shëmtuar? Nuk besoj se ajo ka ndonjë faj për këtë gjë”- kështu është shprehur e ëma e Alennias, Alsida Hasi.
Teksa kanë qendruar gjithë natën në gatishmëri për të pritur fadromat duke ndezur një zjarr e duke u mbledhur rreth tij, banorët kanë uruar Alennian duke i kënduar këngën që e urojnë për datëlindje, ndërsa e ëma u ka shpërndarë disa ëmbëlsira në mënyrë simbolike.
Me lot e dhimbje, banorët e “5 majit” kanë parë të gjithë skenën e shembjes së banesave të tyre, për të cilat investuan një jetë dhe ua shkatërruan brenda pak minutave. Gjithçka mbeti nga këto banesa, ishin vetëm kujtimet…
Discussion about this post