Sekretari i grupit të Partisë Demokratike, Arbi Agalliu ka reaguar për dhunën e ushtruar nga ana e policisë ndaj qytetarëve në Jalë gjatë procesit të prishjes së ndërtimeve pa leje nga ana e IKMT.
Agalliu thotë se ditën e sotme u pa se si i dobëti dhunohet nga shteti dhe i forti mund të bëjë çdo gjë.
“Sot u pa edhe njëherë sesi qytetari i thjeshtë e i pa mbrojtur u dhunua. Sot u pa edhe njëherë sesi banorë që ushqehen me punë të ndershme u dhunuan ditën për diell. Sot u pa edhe njëherë sesi ta prishin pronën pavarësisht se ka vendime gjykate që nuk e lejojnë këtë gjë. Sot u pa edhe njëherë pse shqiptarët duan të ikin me vrap nga ky vend. Sot u pa edhe njëherë sesi shkatërrohet puna e njëriut të ndershëm e punëtor, për të favorizuar “investitorin strategjik”.
Sot u pa edhe njëherë që shqiptarët janë braktisur pikërisht nga Qeveria. Kjo, nuk është Shqipëria që duam, ku nuk ekziston nocioni i pronës së lirë, ku nuk pyeten vendime gjykate dhe ku i forti mund të bëjë çdo gjë” – shprehet Agalliu.
Aksioni i pasdites së sotme i ndërmarrë nga IKMT në zonën e Jalës ka vijuar me përplasje e debate mes pronarëve të objekteve dhe inspektorëve. Banorët, të cilët janë njëkohësisht edhe pronarë të këtyre bizneseve që po shemben, kanë pasur konflikte verbale me përfaqësuesit e IKMT.
