Shembjet në “5 Maji”, hapet procedim penal ndaj Erion Veliajt dhe Arbjan Maznikut -

Prokuroria e Posaçme Kundër Korrupsionit dhe Krimit të Organizuar (SPAK) ka regjistruar një procedim penal për shpërdorim detyre, pas kthimit te dosjes nga gjykata.

Mes personave të kallëzuar janë kryetari i Bashkisë së Tiranës, Erion Veliaj, dhe ish-nënkryetari Arbjan Mazniku, ndërkohë që hetimi po ndiqet nga prokurori Elvin Gogaj.

SPAK kishte kërkuar fillimisht pushimin e çështjes, por gjykata e posaçme urdhëroi rihetim. Çështja lidhet me shembjen e banesave në zonën e “5 Majit” gjatë vitit 2022, që nuk ishin dëmtuar nga tërmeti, në kuadër të një projekti për rindërtim dhe rikualifikim urban.

Shembjet te “5 Maji”

Vendimi i kontestuar për prishjen e 170 banesave në zonën e “5 majit”, që nuk ishin dëmtuar nga tërmeti, krijoi një tjetër grup të madh të pastrehësh. Ky vendim la pa një çati mbi kokë 222 pronarë, një pjesë me banesa të hipotekuara dhe një pjesë tjetër në proces legalizimi.

Në një dalje publike të datës 20 janar 2022, në atë kohë zëvendës kryetar bashkie i Tiranës, Arbian Mazniku i premtoi banorëve të “5 Majit“ se secili prej tyre do të kishte një objekt më të mirë dhe më të shtrenjtë, se ai që kishin aktualisht, por kjo nuk ndodhi kurrë.

Më vonë, Bashkia Tiranë konfirmoi se në zonën e re zhvillimore “5 Maji” po ndërtohen 15 godina (seksione) të reja, nga të cilat kanë përfunduar dhe janë kolauduar punimet në 6 godina, si dhe janë drejt përfundimit ose në proces punimet për 9 godinat e tjera. Por, banorët që kanë përfituar një apartament të ri në këtë zonë, u përkasin njësive të tjera të prekura nga tërmeti në kryeqytetet, ku 40 pallate janë shembur deri tani.

Në dy shorte të hedhura për shpërndarjen e apartamenteve në zonën e “5 majit”, emrat e ish–banorëve nuk figurojnë në listën e fituesve. Ata i humbën shtëpitë jo nga tërmeti i 26 nëntorit, por nga një vendim i qeverisë shqiptare për ndërtimin e “Tirana Riverside”, një qytet futurist që do të strehojë të dëmtuarit e tërmetit, por edhe mjaft institucione publike.

Trajtimi i banorëve prej shumë kohësh me qira, teksa rindërtimi po zhvillohet me ritme shumë të ngadalta, tregon një shpërdorim të financave të buxhetit.

Gjatë protestave të banorëve, shumë prej tyre janë gjobitur dhe dënuar. Ivzi Hoxha, 62 vjeç, u dënua me një vit heqje lirie pasi kanosi kryeministrin Edi Rama në qershor të 2023. Laureta Nikolli është e vetmja banore e lagjes “5 Maji” e cila është gjobitur për ndërtim pa leje, me një milion e dyqind e tetëdhjetë e katër mijë lekë, edhe pse në zonën e 5 majit janë identifikuar edhe 12 godina të tjera të cilat janë pa leje.