Deputetja e PD, Grida Duma, thotë se shembjet e paligjshme nga IKMT në “Prestige Resort” “është paralajmërimi që frika e pushtetit po skërmit dhëmbët e rënë”.
“Të godasësh hapur biznesin, sepse do të heshtësh mediat që të kanë zbuluar korrupsionin; sepse të kanë nxjerrë të palarat e drejtorëve e ministrave që vjedhin e hakërrehen, nuk do të thotë aspak se e lan dot zhulin apo do lash duart kaq kollaj dhe me kaq”, shkruan Duma.
Sot strukturat e Inspektoriatit Kombëtar të Mbrojtjes së Territorit kanë vijuar operacionin në bregdet për të prishur edhe një ndërtim në resortin “Prestige” në Malin e Robit.
Resorti në fjalë ku po kryen shembje IKMT, është në pronësi të botuesit Irfan Hysanbelliu, po ashtu pronar i grupit editorial përbërë nga News24, Balkanweb dhe Panorama. Disa të këtij grupi, thonë se pishinat nuk janë abuzive dhe se “urdhri i prishjes është dhënë nga kryeministri Edi Rama si formë hakmarrje politike kundër linjës editoriale të mediave të Hysenbelliut që prej disa kohësh kanë një qëndrim kundër qeverisë”.
Discussion about this post