Ditën e djeshme Gijotina.com ka denoncuar pazaret që bën kryebashkiakja e Lushnjës me një biznesmen të dënuar para disa vjetësh për korrupsion. Bazuar në dokumente dhe fakte, treguam se është risk i lartë financiar, por edhe për sigurinë e fëmijëve të bashkëpunosh me subjekte të tilla.
Por, me sa duket panorama qenka më e gjerë. Duket sikur kryebashkiakët po përpiqen t’i rregullojnë biografinë Shemsi Sinanit duke i dhënë firmës së tij “4 S” të gjitha paratë për furnizime ushqimesh. Por, kur këto pazare mund të vënë në pikëpyetje realizimin në kohë të kontratave apo më keq të dëmtojnë shëndetin e fëmijëve, pasojat e veprimeve të kryetarëve të bashkive kapërcejnë korrupsionin.
Shohim se edhe në këtë tender, me objekt ‘Blerje Ushqimesh për shtëpinë e foshnjës Durrës”, të hapur më datë 7 mars 2024 nga Bashkia Durrës, ka marrë pjesë vetëm firma “4 S’ me pronar Xhino Sinanin, djalin e Shemsi Sinanit. Po pse, nuk ofroka dot ushqime asnjë kompani tjetër në Shqipëri?! Kjo firmë duhej të refuzohej, sepse është e angazhuar në të njëjtën kohë në kontrata të tjera.
Kapaciteti është një nga kriteret e tenderit.
Open Data e ka vlerësuar me risk korrupsioni këtë prokurim, prandaj i ka vendosur “Flamurin e kuq”.
Vazhdimisht kemi theksuar se ligji kërkon që në ato raste kur nuk ka dy ose më shumë konkurrentë, tenderi duhet të anulohet. Së pari për të marrë oferta të përshtatshme, që të kursehet fondi limit, së dyti, për të garantuar realizimin e furnizimit sipas kushteve.
Por, Sako dhe komisioni i saj nuk e bënë këtë, sepse qëllimi është të xhirohet sa më shpejt fondi tek Sinani, i cili dyshohet se është i paracaktuar. Ky operator ka paraqitur një ofertë sa 99% e fondit limit. Kështu në shkelje të plotë ligjit ‘Për Prokurimet Publike’, drejtoresha e institucionit Mimoza Xhelilaj, sigurisht me mbështetjen e kryetares Sako, i ka falur tenderin Sinanit dhe më datë 18 mars 2024, ka firmosur kontratën me “4 S”.
Ndërkaq po t’i hedhim një sy listës me transaksionet që ka përfituar kjo firmë nga Thesari i Shtetit shohim se në 4 vitet e fundit ka marrë në arkën e saj 5 milionë euro.
Dhe rezulton se më shumë se 70% e këtyre tenderëve janë dhënë pa garë nga bashkitë për të blerë ushqime për çerdhet dhe kopshtet tek Shemsi Sinani.
Duke qenë se ka krijuar miqësi të fortë me zyrtarët e bashkive, familja Sinani po zhvat buxhetin e shtetit përmes tenderave abuzivë. Po ashtu, kompania tjetër “Sinani Trading” ka vjelë 13 milionë euro nga buxheti i shtetit. Me këtë firmë Shemsi Sinani është përfshirë në afera korrupsioni që ne i kemi raportuar disa herë, pasi ka ndryshuar emrin kompanisë dhe ka hapur më vonë firmën “4 S” ku ka vënë familjarët e tij.
Shemsi Sinani është dënuar në vitin 2019 me 4 vjet burg nga Krimet e Rënda për korrupsion aktiv, pasi korruptoi ish-nëndrejtorin e përgjithshëm të Burgjeve Iljaz Labi, edhe ky i dënuar për të njëjtën vepër penale.
Dënimi për Labin u pezullua sepse bashkëpunoi me drejtësinë, duke rrëfyer skemën e korrupsionit tek Burgjet, me në krye ish-kreun e burgjeve Artur Zoto.
Sapo u kap në korrupsion, Shemsi Sinani, në mars të vitit 2018, ndryshoi emrin e kompanisë nga “M. B. KURTI” në “Sinani Trading”. Me emrin e ri, “Sinani Trading”, Shemsi Sinani ka menduar se do të pastronte imazhin, por bloza e korrupsionit vetëm sa po përhapet duke lënë gjurmë nëpër zyrat e bashkive. Shemsi Sinani, po në mars të vitit 2018, u largua formalisht nga kompania dhe nxori në skenë të birin, që thjeshtë ka emrin në letra.
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post