Në Shqipëri problemet e shëndetit mendor po trajtohen me përparësi nga specialistë të fushës dhe aktivistë që mbrojnë të drejtat e njeriut. Ngjarja tronditëse në Fier ku një shtetas vrau një fëmijë 8 vjeçar e nxiti edhe më tej këtë debat, pas dyshimeve se vrasësi vuante nga sëmundje mendore, gjë që u mohua paraprakisht nga autoritetet. Ekspertët mendojnë se ka mangësi në burime njerëzore dhe se shërbimet nuk ofrohen në mënyrë të barabartë në të gjithë territorin e vendit. Zyrtarë të Ministrisë së Shëndetësisë thanë për Zërin e Amerikës se po punohet për deinstitucionalizimin, rritjen e identifikimeve dhe referimeve si dhe forcimin e rolit të mjekut të familjes.
Problemet e shëndetit mendor në Shqipëri, po marrin gjithnjë e më shumë vëmendje, si pasojë e trysnisë së organizatave që mbrojnë të drejtat e njeriut dhe Komitetit kundër torturës në KE. Ngjarja e rëndë në Fier ku një shtetas vrau fqinjin 8 vjeçar, shërbeu si shkak për hapjen e një debati të gjerë në radhët e ekspertëve mbi trajtimin e problemeve të shëndetit mendor në Shqipëri, pasi banorët raportuan fillimisht se vrasësi vuante nga këto probleme, gjë që më pas u mohua paraprakisht nga autoritetet.
Ekspertët por dhe zyrtarët nënvizojnë me shqetësim se dy fatkeqësitë e njëpasnjëshme, tërmeti i 26 nëntorit të vitit 2019 dhe pandemia e koronavirusit që ende vazhdon, kanë ndikuar negativisht tek problemet e shëndetit mendor në Shqipëri, duke shtuar në mjaft raste, ankthin dhe depresionin si pasojë e izolimit dhe rrezikut për jetën nga infeksioni që shkakton pandemia.
Discussion about this post