Një operacion vërtet i madh i zhvilluar gjatë natës në Bruksel me më shumë se 1 mijë policë kanë vënë në pranga 64 shqiptarë pasi kanë zbuluar që prodhonin kokainë.
Të arrestuarit ishin pjesë e grupit që kishte në zotërim gjashtë laboratore droge, ku prodhonin kokainë e më pas e shpërndanin për shitje me shumicë. Autoritetet belge kanë zbuluar se më shumë se një ton kokainë dilte nga laboratorët çdo javë.
Lënda narkotike transportohej në një numër të madh vendesh evropiane përmes korrierëve. Vendet në të cilat shpërndahej lënda narkotike janë: Itali, Gjermani Suedi, Angli, Francë, Holandë dhe Portugali.
Javën e kaluar u zhvillua operacioni i parë në Liezh, që u pasua nga një tjetër operacion në Antëerp të hënën, ndërsa të martën u zhvillua ai në kryeqytet.
“Po shënjestrojmë trafikun e kokainës. Nuk është domosdoshmërisht një çështje sekuestrimi droge në sasi të larta, por shkatërrimin e një bande trafiku droge aktive në trafikun ndërkombëtar të kokainës”, tha zëdhënësi i Prokurorisë Federale belge, Eric Van Dyuse.
Ky operacion po kryhet pasi Belgjika cilësohet si një nga portat hyrëse të kokainës në Europë dhe se vendi konsiderohet me një risk të lartë të përfshirjes së mafias.
Për vite me radhë, rrjetet kriminale kanë trafikuar me tonelata kokainën nga portet e Antëerp-it në Belgjikë, Hamburgu në Gjermani dhe Le Havre në Francë. Brukseli duket se është shndërruar në një qendër logjistike ku droga përpunohet në laboratorë dhe ruhet në ndërtesa të ndryshme, ndonjëherë edhe në zemër të qytetit, përpara se të shpërndahet në vendet e tjera.
E rëndësishme për këtë operacion ka qenë dekriptimi i mesazheve të kriminelëve që i shkëmbenin nëpërmjet një rrjeti komunikimi që mendonin se ishte e sigurt. Në qendër të hetimit ka qenë trafiku i kokainës, që në Europë sipas mediave, menaxhohet kryesisht nga ‘Ndragheta dhe mafia shqiptare, të cilët kanë kontakte direkte me prodhuesit në Amerikën Latine dhe lehtësojnë shpërndarjen në Gjermani, Itali dhe Belgjikë.
Në operacionin në Antëerp, policia ka arrestuar 10 persona. 6 prej tyre kanë punuar më parë në port. Në Liezh, 27 persona janë arrestuar në lidhje me një sasi droge me vlerë 80 milionë Euro. Po ashtu gjatë operacioneve janë sekuestruar 8 armë zjarri, mes tyre 5 Kallashnikovë, 80 mijë Euro cash, celularë të enkriptuar, mjete, dhe bizhuteri me vlerë.
Mediat blege nga ana tjetër flasin për aleancat e forta mes klaneve kalabreze dhe ‘Ndragheta-s me mafian shqiptare. Kjo lidhje e fortë është përdorur sidomos për operacionet e trafikut të drogës nga Amerika Latine drejt Europës.
