“Sherifi do të vijë”, Berisha: Ardhjen e LaCivitta po e lë surprizë për Ramën, që t’i bjerë tavolinës me kokë

Kryetari i Partisë Demokratike, Sali Berisha, njoftoi në një konferencë për shtyp se datëa e ardhjes së Chris LaCivita, do të jetë një surprizë për kryeministrin Edi Rama.

Ai siguroi se LaCivita do të vijë dhe do të luajë një rol të rëndësishëm, duke përmendur se ky i fundit do të jetë një “sherif” që do të kontribuojë në fushatën e PD.

Berisha theksoi se çdo shpenzim i partisë do të jetë transparent dhe në përputhje me ligjet e Shqipërisë dhe atyre të vendeve të tjera. Ai sqaroi se puna me LaCivita po realizohet online çdo ditë, ndërsa një përfaqësues i kompanisë së tij do të instalohet përfundimisht për të punuar pranë partisë. Berisha theksoi se ky është një proces standard për konsultat elektorale me kompani të specializuara.

“Datën e ardhjes, unë u garantoj që do të vijë, por po e lë si surprizë për Edi Ramën që t’i bjerë tavolinës me kokë kur të vijë.
Nuk po ua them se duhet ta ketë surprizë ai. Do vijë.
Sherifi do vijë. Chris do vijë.
Çdo gjë, ju siguroj se çdo shpenzim i kësaj partie, do të jetë transparent dhe në përputhje me ligjet e Shqipërisë dhe ligjet e vendit tjetër.
Prandaj këtu nuk mund të ketë asnjë lloj aludimi tjetër.
Do jetë edhe në zyrë, edhe online. Tani online e kemi çdo ditë sa për dijeni.
Çdo ditë punojmë me të, funksionon me këshilla, me probleme.
Do ketë një njeri të kompanisë së tyre të instaluar përfundimisht. Ai do shkojë, do vijë.
Kjo është praktika e punës me këto kompani konsultative elektorale”, tha Berisha.