Një konflikt i dhunshëm mes adoleshentësh ka lënë të plagosur dy nxënës në Kamëz, duke sjellë edhe njëherë në vëmendje çështjen e sigurisë në shkolla.
Sipas informacioneve paraprake nga policia, sherri ka nisur rreth orës 10:50 të mëngjesit në bulevardin “Nënë Tereza”, pranë gjimnazit “Ibrahim Rugova”. Fillimisht, konflikti mes disa shtetasve të mitur, të moshave 15-17 vjeç, dyshohet se ka nisur brenda ambienteve të shkollës dhe më pas ka vazhduar jashtë. Në përleshje janë përfshirë rreth pesë persona.
Si pasojë e përdorimit të një mjeti të mprehtë, dy 16-vjeçarë, me inicialet A.L. dhe B.T., kanë marrë plagë të rënda, ku njëri prej tyre me plagë në kraharor. Menjëherë, dy adoleshentët janë dërguar me urgjencë në Spitalin e Traumës në Tiranë, ku ndodhen nën kujdesin e mjekëve. Gjendja e tyre shëndetësore raportohet të jetë serioze. Gjithashtu, një bashkëmoshatar i tyre ka marrë dëmtime të lehta, por është jashtë rrezikut për jetën.
Policia sqaron se ka ndërhyrë duke shoqëruar disa prej personave të përfshirë në konflikt dhe po vijon me marrjen e dëshmive. Një grup hetimor po punon intensivisht për të zbardhur rrethanat e plotë të rastit, identifikimin dhe kapjen e të gjithë shtetasve të përfshirë, shtuan të njëjtat burime.
Kjo ngjarje tragjike sjell edhe njëherë në vëmendje problematikën e akteve të dhunshme që vijojnë të ndodhin në shkollat shqiptare, pavarësisht premtimeve të autoriteteve. Incidenti i sotëm, i cili vjen pas një sërë ngjarjesh të rënda të raportuara muajt e fundit, siç ishte vrasja e një 14-vjeçari në dhjetor të vitit të kaluar, konfirmon dështimin e masave të marra. Edhe pas asaj tragjedie, autoritetet njoftuan marrjen e masave shtesë të sigurisë, por ngjarje të tilla të dhunshme vazhdojnë, duke vënë në pikëpyetje efektivitetin e tyre dhe nevojën për një qasje më të thellë në edukimin dhe sigurinë e brezit të ri.
Discussion about this post