Motër e vëlla qëndrojnë pas vendosjes së tritolit në derën e shtëpisë së Ardian Fierzës, mëngjesin e 10 nëntorit në Shkodër. Në një njoftim për mediat, policia e këtij qyteti thotë se ka mundur të zbardhë jo vetëm këtë ngjarje, por edhe atë të 29 gushtit, ku të njëjtit person iu vendos tritol në biznesin e tij, një agjenci funerale pranë spitalit të Shkodrës.
Kështu, sipas policisë si ngjarja e nëntorit ashtu sikurse ajo e gushtit kanë të njëjtin autor, një 35-vjeçar i cili është shpallur në kërkim. Ndërsa motra e tij 38-vjeçare, u vu në pranga si bashkëpunëtore në këto ngjarje. Po sipas policisë, shkak për vendosjen e tritolit dyshohet të jetë bërë një konflikt pronësie mes 38-vjeçares dhe Fierzës, për agjencinë funerale.
“Si rezultat i një pune intensive hetimore, të kryer me metoda speciale, nga specialistët për Hetimin e Krimeve të Komisariatit të Policisë Shkodër, në bashkëpunim me Prokurorinë, u bë i mundur dokumentimi me prova ligjore i dy rasteve të vënies së lëndës plasëse në biznesin dhe në banesën e Ardian Fierzës. Bazuar në provat e siguruara gjatë hetimit proaktiv, rezultoi se autori i dyshuar edhe për rastin e dytë të vënies së lëndës plasëse, është shtetasi B. P., 35 vjeç. Në vijim të hetimeve rezultoi se ky shtetas ka bashkëpunuar me motrën e tij, shtetasen L. P., për marrjen e një shume parash nga Ardian Fierza, me të cilin kishte konflikt pronësie për agjencinë funerale”, thuhet në njoftimin e policisë.
Gjatë kontrollit në parukerinë e 38-vjeçares policia gjeti kanabis, ndërsa në shtëpinë e vëllait të saj u zbulua armë.
“Në vijim të veprimeve procedurale u bë arrestimi i shtetases L. P.(R)., 38 vjeçe, banuese në Shkodër. Gjatë kontrollit në subjektin që administronte (parukeri), shërbimet e Policisë kanë gjetur dhe sekuestruar 0.5 kg lëndë narkotike kanabis. Gjithashtu, gjatë kontrollit në banesën e shtetasit B. P., me precedent të mëparshëm për armëmbajtje pa leje, shërbimet e Policisë kanë gjetur të fshehura dhe kanë sekuestruar: 1 armë zjarri pistoletë, municion luftarak, 1 radio dore si e Policisë, 1 laptop, 1DVR dhe 11 celularë. Vijon puna për kapjen e 35-vjeçarit”.
Në ngarkim të 35-vjeçarit, policia e Shkodrës ka ngritur 5 akuza, ndërsa ndaj motrës së tij 3.
“Materialet procedurale shtesë i kaluan Prokurorisë, për veprime të mëtejshme, për shtetasin B. P., për veprat penale “Shkatërrimi i pronës me eksploziv”, “Mbajtja pa leje dhe prodhimi i armëve, armëve shpërthyese dhe i municionit”, “Shtrëngimi me anë të kanosjes ose dhunës për dhënien e pasurisë”, kryer në bashkëpunim, “Prodhimi dhe shitja e narkotikëve”, kryer në bashkëpunim, dhe ”Ndërhyrje të padrejta në jetën private”, si dhe për shtetasen L. P.(R)., për veprat penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim, “Prodhimi dhe shitja e narkotikëve”, kryer në bashkëpunim, dhe ”Ndërhyrje të padrejta në jetën private”.”
Discussion about this post