Policia ka zbardhur pas 24 orësh konfliktin me armë të ndodhur një ditë më parë në shkollën “Çajupi”, ku janë përfshirë të paktën 7 persona. Për këtë ngjarje, e cila tronditi kryeqytetin, policia tha se ka arrestuar 1 persona dhe ka proceduar penalisht 5 të tjerë. Gjithashtu, policia ka shpallur në kërkim një tjetër.
Nga veprimet hetimore ka rezultuar se në një lokal në afërsi të një shkolle në rrugën “Kongresi i Manastirit”, fillimisht janë konfliktuar verbalisht dy mësuese, Elida Qenami, 46 vjeçe dhe Domenika Toptani, 53 vjeçe. Dy arsimtaret mësohet se janë konfliktuar për një vend qëndrimi në lokal.
Më pas janë përfshirë në konflikt duke përdorur sende të forta, të afërmit përkatës të tyre, konkretisht shtetasit Edmond Faja, Enrik Qenami, 41 vjeç, Ndriçim Qefalia, 43 vjeç dhe Laert Duro, 41 vjeç (të afërmit e Elida Qenamit) dhe shtetasit Elton Kasaj, 30 vjeç, Enea Kovaçi, 32 vjeç dhe Alvaro Toptani, 27 vjeç (të afërmit e shtetases Domenika Toptani. Si pasojë e konfliktit është dëmtuar me sende të forta Enea Kovaçi, 32 vjeç, i cili ndodhet në spital, jashtë rrezikut për jetën.
Gjithashtu, gjatë konfliktit dyshohet se Edmond Faja ka qëlluar në ajër me një armë zjarri pistoletë, e cila u sekuestrua në cilësinë e provës materiale.
Nga ana tjetër, Ministria e Arsimit ka pezulluar nga detyra dy mësueset e përfshira në konfliktin e ditës së djeshme pranë shkollës “Andon Zako Cajupi”.
