Një person është arrestuar në Lezhë pas sherrit të ndodhur në ndeshjen e Kategorisë së Dytë midis Shënkollit dhe Orikut në Lezhë.
Nga njoftimi i policisë mësohet se në pranga ka rënë një 20-vjecar me inicialet A.Z, pasi ka hyrë në fushë dhe ka goditur me grushte trajnerin dhe një lojtar të skuadrës së orikut.
“Specialistët për Hetimin e Krimeve në Komisariatin e Policisë Lezhë, bënë arrestimin në flagrancë të shtetasit A.Z., 20 vjeç, banues në Shenkollë, Lezhë, për veprën penale “Goditja e sportistit, tajnerit, apo arbitrit, ndërmjetësit sportiv. Ky shtetas, gjatë zhvillimit të ndeshjes Shenkolli-Orikumi, në Shenkollë, Lezhë, pasi arbitri ka ndëshkuar me karton të kuq një nga lojtarët e Shënkollit, ka hyrë në fushë duke goditur me grushte lojtarin dhe trajnerin e skuadrës së Orikumit shtetasit A.V. dhe B.Sh.”,-bën me dije policia.
Rikujtojmë se ditën e djeshme sfida e javës së gjashtë midis këtyre dy skuadrave ka degjeneruar me dhunë, pasi arbitri i dha karton të kuq një prej lojtarëve të vendasve në minutën e 83-ë të takimit.
Në fillim në sherr janë përfshirë lojtarët, më pas në fushë janë futur edhe stafet teknike e në fund situata degjeneroi edhe më keq me përfshirjen edhe të tifozëve.
Kjo gjendje detyroi arbitrin të mbyllte takimin që deri në atë moment ishte me rezultatin 0-1 dhe më pas shumë persona u shoqëruan në komisariat, përfshirë këtu edhe lojtarë./K.T/Gijotina.com
