Ka rënë në prangat e policisë bashkëpunëtori i 48-vjeçarit që u arrestua më 29 tetor për plagosjen e rëndë në Përmet. Uniformat blu bëjnë me dije se në pranga ka rënë 25-vjeçari J.N i shpallur në kërkim që prej 28 tetorit.
I riu është i biri i autorit K.N të arrestuar rreth tre javë më parë. Ditën e 28 tetorit babë e bir kanë goditur me leva 3 persona të identifikuar me inicialet Dh. Xh., K. Xh. dhe E. A., të cilëve iu kanë shkaktuar dëme të rënda.
Babë e bir, të dy banues në Përmet, akuzohen për veprat “Plagosja e rëndë me dashje”, kryer në bashkëpunim dhe “Prishja e qetësisë publike”.
Materialet procedurale i kaluan Prokurorisë pranë Gjykatës së Rrethit Gjyqësor Përmet për veprime të mëtejshme.
Lexo edhe: Apeli pranon kërkesën e SPAK, sërish burg për Alqi Bllakon
Njoftimi i Policisë:
Përmet
Lokalizohet, kapet dhe vihet në pranga, një 25-vjeçar, i kërkuar si bashkautor i plagosjes së rëndë, me sende të forta, të 3 shtetasve, ngjarje e ndodhur më 28.10.2022.
Autori tjetër i kësaj plagosjeje (babai i të ndaluarit), u vu në pranga nga shërbimet e Policisë, menjëherë pas ngjarjes.
Shërbimet e Komisariatit të Policisë Përmet në bashkëpunim me shërbimet e Komisariatit të Policisë Nr.1, Tiranë, si rezultat i veprimeve të mirëkoordinuara, si dhe duke u mbështetur në inteligjencën informative, bënë të mundur kapjen në qytetin e Tiranës, dhe ndalimin e shtetasit J. N., 25 vjeç, banues në Përmet.
25-vjeçari ishte shpallur në kërkim pasi më datë 28.10.2022, në bashkëpunim me babanë e tij, shtetasin K. N. (të arrestuar menjëherë pas ngjarjes), janë konfliktuar në vendin e quajtur “Agjencia”, Përmet, me 3 shtetas të tjerë, të cilët i kanë plagosur rëndë, me sende të forta.
Materialet procedurale i kaluan Prokurorisë, për veprime të mëtejshme.
Discussion about this post