Sherri me thika në Maliq që përfundoi në vrasje, flet vëllai i autorit: Më vjen turp, ata kanë qenë…

Vëllai i autorit Vel Azisllari që vrau dje me thikë 60- vjeçarin Neso Sotiri në Maliq, ka folur për ngjarjen.

Ai është shprehur para gazetarëve i tronditur, ndërsa tregon se ngjarjen e ka mësuar përmes televizionit. Ai tha se kishte ardhur me pushime dhe se vetëm një ditë e kishte parë të vëllanë.

“Çfarë të të them, jam i tronditur. Të vritesh për këto gjëra. Më vjen turp. Unë erdha me pushime dhe ndodhi kjo që ndodhi. Në vitet që kam qenë unë, ata të dy kanë qenë miq e kanë pasur raporte shumë të mira me njëri-tjetrin”, thotë ai.

Edhe fqinjët flasin për dy persona që kanë pasur raporte të mirë dhe nuk njiheshin për konflikte të mëparshme, ndërsa shprehen të tronditur për rastin.

Theksojmë sërish se ngjarja ndodhi mbrëmjen e djeshme në fshatin Rembec, viktima është identifikuar si Nesti Sotiri, rreth 60 vjeç, i cili u qëllua me thikë nga Velo Azisllari, i cili ka mbetur po ashtu i plagosur dhe ndodhet në spital.

Sherri mes tyre ka nisur për motive të dobëta, teksa të dy kanë goditur njeri-tjetrin dhe janë dëmtuar me mjete prerës.