Grupi Parlamentar i Partisë Socialiste do të kërkojë përjashtimin e 7 deputetëve të opozitës, pas sherrit të së hënës pasdite në Parlament, ku pati edhe përleshje fizike.
Deputetët socialistë kanë nisur të firmosin kërkesën për përjashtimin nga punimet e Kuvendit të 7 kolegëve opozitarë, që sipas tyre, janë përgjegjësit për kaosin të krijuar.
Bëhet fjalë për Flamur Nokën, Gazmend Bardhin, Bledian Nallbati, Edi Paloka, Albana Vokshi, Lefter Gështenja dhe Saimir Korreshi.
Të hënën, deputeti Bledion Nallbati u përjashtua nga seanca pasi tentoi të godiste me grusht deputetin socialist, Vullnet Sinaj, teksa ky i fundit po mbante fjalën e tij.
“Nuk ia vlen që të merremi me diçka që nuk nderon askënd”, tha Nallbati një ditë më pas duke komentuar episodin e shëmtuar.
Sakaq, deputeti socialist Sinaj tha se nuk do ta denonconte Nallbatin.
Seanca e radhës plenare është parashikuar ditën e enjte, teksa palët politike vijojnë strategjinë e tyre, opozita me bllokadë parlamentare, ndërsa mazhoranca miratimin e aktive pa diskutime.
Discussion about this post