Kastriot Hasalla, i dyshuar për vrasjen e kushëririt të tij Romeo Hasalla ka dalë para gjykatës së Lushnjes ditën e sotme, e cila vendosi masën e sigurisë “arrest me burg”.
Kastrioti ka pohuar autorësinë e vrasjes para trupës gjykuese dhe ka kërkuar që të mos mbahen peng vëllaiu dhe djali i tij pasi ata nuk kanë qenë bashkëpunëtorë në vrasje dhe është shprehur se krimi është kryer në kushte të rënduara psikologjike.
Gjatë seancës vëllai i tij Jonus Hasalla ka deklaruar se kërkon mëshirë dhe që të mos i jepet burgim i përjetshëm. Ndërkaq deklaroi se do të shkojë në familjen e viktimës për ngushëllim edhe nëse ata do e vrasin.
“Dua mëshirë jo me burgim të përjetshëm por edhe pala tjetër e ka viktimën sepse dhe ai u fut në dhe djalë i ri dhe ai. Edhe ai bir nëne është ka lënë një fëmijë dhe një grua dhe se dëshiroj kurrë që të shkonte në atë fazë po kjo punë arriti. I tremben hakmarrjes se çfarë nuk bën vaki. Unë nuk e di se kur do të vijë vdekja se po ta dija do thoja hajde më merr mua. Skam kontaktuar me palën tjetër. Do shkoj të kontaktoj, le të më vrasin, nesër apo pasnesër do shkoj, duart do i lidh sipas zakonit do i then më vra ose mi zgidh, do shkoj ta ngushëlloj. Po të dojë të më vrasë po do shkoj”, tha ai.
Ngjarja e rëndë ka ndodhur mëngjesin e 29 korrikut në fshatin Garunjas të Lushnjes ku pas një sherri për tokën ka mbëtur i vrarë 30-vjeçari Romeo Hasalla dhe janë plagosur babai dhe dy vëllezërit e tij. Kushërinjtë Hasalla kishin konflikt prej vitesh në lidhje me një tokë në fshatin e tyre, që sipas nënës të të ndjerit ishte “tokë-shtet” dhe ata kishin vendosur që të mbillnin disa degë ulliri. Viktima Romeo Hasalla, babai i dy fëmijëve të mitur, kishte ardhur nga Greqia vetëm 2 ditë para se të gjente vdekjen dhe kishte shkuar që t’i ndihmonte familjes por humbi jetën.
