Ministrja e Arsimit, Sportit dhe Rinisë, Evis Kushi ka reaguar për herë të parë lidhur me konfliktin e ndodhur në shkollën Çajupi ku ishin të përfshira 2 mësuese dhe gjendja degradoi deri në përplasje fizike dhe përdorim armësh nga familjarët e tyre.
Përmes një postimi në Facebook, ajo shkruan se ka bërë një vizitë në këtë shkollë ku dhe ka biseduar me nxënësit dhe mësuesit atje, për të forcuar disiplininën dhe Kodin e Etikës në këtë shkollë.
Sipas saj, nuk është e drejtë që të hiqen vlerat e mësuesve për një sherr që ndodhi në një shkollë. Por, kujtojmë se skandali në shkollë ka ndodhur para 5 ditësh, ndërsa ministrja Kushi u kujtua në fundjave të reagojë.
“Të gjitha profesionet janë të nderuara, por mësuesi mbetet në çdo kohë e në çdo vend figura më e dashur dhe më e respektuar për të gjithë. Vlerat që ai mbart janë të jashtëzakonshme dhe të pazëvendësueshme në mirëedukimin e fëmijëve tanë. Nisur nga ngjarja e rëndë, ku të përfshira ishin dy mësuese të gjimnazit “Andon Zako Çajupi” në Tiranë, dje zhvillova një vizitë pranë kësaj shkolle, e cila ndër vite ka spikatur përherë me talente e rezultate pozitive në çdo fushë. Pasi i urova fillimisht shumë suksese e mbarësi nxënësve në këtë fillim viti shkollor, bashkëbiseduam gjerësisht me mësuesit për çështje shkollore që kanë nevojë për adresim, për lartësimin më tej të figurës së mësuesit, si dhe forcimin e vazhdueshëm të Komisioneve të Etikës dhe Disiplinës, për të garantuar vetëm mbarëvajtje në proceset e shkollës”, shkruan ajo.
Kujtojmë se sherri nisi të hënën fillimisht mes dy mësueseve në gjimnazin “Andon Zako Çajupi” dhe më degjeneroi deri në përplasjen me sende të forta në mes të rrugës, e madje deri tek të shtënat me armë.
