Presidenti Ilir Meta mori pjesë në Konferencën Ndërkombëtare e cila lidhet me botën pas pandemisë së Covid-19, nga ku pati dhe fjalën e tij.
Në një postim në rrjetin social “Facebook”, Meta shkruan se ka pasur një abuzim të pushtetit për shkak të mungesës së një protokolli të unifikuar standard.
“Të gjithë e dimë se mungesa e një protokolli të unifikuar standard për kontrollin e pandemisë dhe disa masave të caktuara kontradiktore e jo të bazuara në kërkime thelbësore shkencore, krijuan një terren të përsosur për abuzimin e pushtetit, veçanërisht nga autokratët dhe regjimet e tyre”, shkruan Meta.
Për presidentin, ndërhyrja e forcave ushtarake, forca e panevojshme imponuan disa pengesa të cilat ishin totalisht të panevojshme. Këta faktorë nuk ndihmuan aspak në në drejtim të kontrollit të pandemisë.
Sipas tij, vendet të cilat dëgjuan dhe ndoqën me kujdes këshillat e shkencës dhe kërkimit shkencor, ishin shumë më tepër efikas e më të suksesshëm.
“Këto nuk ndihmuan aspak në drejtim të kontrollit të pandemisë! Vendet dhe politikanët, të cilët dëgjuan dhe ndoqën me kujdes këshillat e shkencës dhe kërkimit shkencor, ishin shumë më tepër efikas e më të suksesshëm, veçanërisht në mbrojtjen e jetës dhe shëndetit të qytetarëve”, ka pohuar presidenti Meta.
