Kryetari i Partisë Demokratike, Sali Berisha, ka reaguar për ndarjen nga jeta të Shpëtim “Shik” Stërmasit, duke e cilësuar atë një figurë të shquar dhe një hero të qëndresës ndaj diktaturës komuniste.
Në një postim në Facebook, Berisha shkruan se Stërmasi, pjesë e një familjeje të vjetër atdhetare të Tiranës, u arrestua në moshë të re dhe kaloi dekada në burgjet e regjimit komunist, ku qëndroi i palëkundur përballë hetuesve dhe torturave.
Pas rënies së diktaturës, sipas Berishës, Stërmasi shërbeu si zyrtar dhe oficer i lartë policie në Ministrinë e Brendshme, si dhe drejtoi policinë në disa rrethe të vendit.
Berisha e përshkruan atë si një qytetar të ndershëm e dinjitoz, si dhe prind e bashkëshort shembullor. Në fund të mesazhit, ai i shpreh ngushëllime familjes, miqve dhe të afërmve të Stërmasit, duke e cilësuar atë si një njeri që “jetoi si hero i pamposhtur dhe iku si legjendë”.
Postimi i plotë:
Shik Stërmasi jetoi si hero dhe u largua si legjendë!
Miq, Shik (Shpëtim) Stërmasi mbylli dje sytë përgjithmonë. Pasardhës i një familjeje të vjetër atdhetare të Tiranës, me kontribut të veçantë në jetën e qytetit, Shik Stërmasi do të arrestohej i ri dhe do të kalonte dekada në burgjet më të egra të diktaturës si armik i regjimit komunist. Ai do të qëndronte si një hero i vërtetë përballë hetuesve xhelatë dhe torturave më çnjerëzore.
Pas rënies së diktaturës komuniste, Shik Stërmasi punoi si zyrtar e oficer i lartë policie në Ministrinë e Brendshme, drejtues trim, i ndershëm dhe guximtar i policisë në disa rrethe të vendit. Ai ishte një qytetar i virtutshëm dhe dinjitoz i Tiranës, prind dhe bashkëshort shembullor.
Duke shprehur nderimin tim më të madh për personalitetin e tij dhe mirënjohjen më të thellë për kontributin e tij të çmuar, i shpreh familjes së tij të nderuar, miqve dhe të afërmve të tij ngushëllimet më të ndjera. I lutem Zotit që shpirti i madh i Shikut të tyre të dashur, që jetoi këtë jetë si një hero i pamposhtur dhe iku si legjendë, të gjejë paqen e merituar.
Ngushëllime! #sb
Discussion about this post