Kapitenët e disa kombëtareve gjatë “Katar 2022” do të mbajnë në krah shiritin e kapitenit me ngjyrat e ylberit, i cili është bërë masivisht në mbështetje të komunitetit LGBTQ+.
Një gjest domethënës për komunitetin, megjithatë ka edhe nga ata futbollistë që refuzojnë të mbajnë një shirit të tillë.
Është pikërisht kapiteni i Feyenoord Orkun Kokcu u tërhoq nga roli i tij për ndeshjen ndaj AZ Almaar. Kokcu nëpërmjet një mesazhi në rrjetet sociale theksoi se për shkak të besimit të tij, nuk ishte personi i duhur për të përcjellë një mesazh të tillë.
“Kam vendosur që të mos e mbaj shiritin me ngjyrat e ylberit. Është e rëndësishme të theksoj se unë respektoj këdo pavarësisht zgjedhjeve në jetë, secili është i lirë të jetojë si të dëshirojë. Unë e kuptoj shumë mirë edhe mesazhin që kërkon të përcjellë sporti në lidhje me komunitetin LGBTQ+, por për shkak të besimit tim nuk ndihem si personi i duhur për ta mbajtur shiritin.
Nuk ndjehem rehat dhe e kuptoj që disa njerëz mund të jenë të zhgënjyer nga veprimi im, por absolutisht nuk është ky qëllimi. E di që edhe shumë persona mund të mos i besojnë fjalët e mia, por shpresoj të kuptojnë se një vendim i tillë vjen si pasojë e besimit tim dhe mendoj se diçka e tillë duhet respektuar”, u shpreh Kokcu. Pas kësaj zgjedhje të Kokcu, shiritin me ngjyrat e ylberit në ndeshjen ndaj AZ Alkmaar e mbajti lojtari austriak, Gernot Trauner.
Discussion about this post