Shiste drogë në lokalet e natës, arrestohet 33-vjeçari në Tiranë

Një tjetër shtetas i shpallur në kërkim për veprimtari kriminale në fushën e narkotikëve është vënë në pranga nga Policia e Tiranës.

Shtetasi A. B., 33 vjeç, u arrestua në zonën e Kasharit, si rezultat i informacioneve të siguruara në rrugë operative dhe të administruara me shpejtësi nga shërbimet e Seksionit për Hetimin e Narkotikëve, në bashkëpunim me Komisariatin e Policisë Nr. 6.

Policia bën të ditur se ky shtetas ishte në kërkim në kuadër të megaoperacionit “Blloku 33” dhe dyshohet se ushtronte aktivitet kriminal të shitjes së lëndëve narkotike në lokalet e natës, në kryeqytet.

Me arrestimin e tij, shkon në 27 numri i të arrestuarve gjatë këtij operacioni të gjerë antidrogë.
Policia bën me dije se vijojnë kërkimet për kapjen e edhe 6 personave të tjerë të shpallur në kërkim.

Materialet procedurale i janë referuar Prokurorisë së Tiranës për veprime të mëtejshme.