Sokol Topçiu, administratori i Farma Net Albania, i cili u arrestua si pjesë e një grupi që kishin ngritur një skemë për shitjen e ilaçeve kontrabandë gjatë pandemisë së COVID, është liruar nga qelia ditën e sotme. Gjykata vendosi sot që ai të gjykohet nën masën ‘arrest shtëpie’. Lirimi i Topçiut nga qelia vjen vetëm 3 ditë pas lirimit të 6 personave të tjerë të arrestuar të cilët, po ashtu u lanë në “arrest shtëpie”.
Raportohet se seanca u mbajt me dyer të mbyllura, ndërkohë që e njëjta masë u dha dhe për 4 të arrestuar të tjerë, Blerim Bitri, Florian Marku, Florian Lila administratorë farmacie dhe Bashkim Osmani, administrator i një depoje farmaceutike
Sokol Topçiu u vu në pranga më 11 tetor, ndërsa ende në kërkim janë edhe 5 persona të tjerë, të cilët dyshohet se janë të përfshirë në këtë skemë. Topçi është administratori i Farma Net Albania, që ka rrjet farmacish, prej 100 të tillash në të gjithë vendin.
4 farmaci dhe depo farmaceutike kanë bashkëpunuar me njëra-tjetrën për t’u shitur qytetarëve ilaçe kontrabandë. Në këtë skemë ishin të përfshirë 4 administratorë të farmacive dhe të depove farmaceutike në Tiranë, të cilët ranë në pranga. Më konkretisht u arrestuan Blerim Bitri 40 vjeç, administrator i një farmacie; Florian Marku 39 vjeç, administrator i një farmacie; Florian Lila administrator i një farmacie dhe Bashkim Osmani administrator i një depoje farmaceutike dhe Sokol Topçiu.
Gjatë hetimeve 10 mujore për operacionin “Përfitimi” oficerët e policisë kanë kryer blerje të stimuluara në këto biznese, duke dokumentuar edhe aktivitetin e kundraligjshëm të shitjeve dhe tregtimit të ilaçeve kontrabandë.
