Kryeministri Edi Rama dhe ministri i Infrastrukturës dhe Energjisë, Enea Karakaçi, kanë inspektuar këtë të shtunë rrugën provizore në aksin Librazhd–Prrenjas, e cila është stabilizuar përkohësisht dhe është hapur për qarkullimin e mjeteve, përfshirë edhe ato të tonazhit të rëndë.
Sipas qeverisë, lëvizja e automjeteve tashmë kryhet përmes një devijimi provizor në gjurmën e Korridorit VIII, pas ndërhyrjeve emergjente për stabilizimin e zonës ku ndodhi rrëshqitja e tokës.
Inspektimi vjen pas disa ditësh kaosi në këtë aks kombëtar, një nga rrugët kryesore që lidh Tiranën me juglindjen e vendit, i cili u bllokua për shkak të shembjeve dhe rrëshqitjeve të dherave në zonën e njohur si Arra e Gurrës. Bllokimi solli vështirësi të mëdha për qarkullimin drejt Korçës dhe Pogradecit, ndërsa qytetarët dhe bizneset u përballën me vonesa dhe devijime të gjata rrugore.
Vizita e kryeministrit në kantier vjen vetëm pasi rruga u hap përkohësisht, si një tjetër “show politik” për të mbuluar situatën e krijuar nga bllokimi disa ditor i një prej arterieve kryesore të vendit.
Gjatë ditëve kur aksi ishte i pakalueshëm, Rama reagoi publikisht duke mohuar çdo përgjegjësi të qeverisë.
Edhe këtë herë ai ja ka hedhur fajin reshjeve, duke thënë se rruga u shemb si pasojë e kushteve të vështira atmosferike dhe shirave të vazhdueshëm që shkaktuan sipas tij rrëshqitjen dhe jo nga gërryerja e shtratit të lumit.
Në reagimet e tij publike, kryeministri u shpreh se lidhja e kësaj ngjarjeje me korrupsionin është “zero”, ndërsa rrëshqitja sipas tij ka ndodhur në segmentin e vjetër të rrugës dhe jo në aksin e ri që po ndërtohet.
“Tollovia që u shemb rruga nga punimet, është një manipulim dhe perversitet i madh sepse këtu jemi në aksin e vjetër, aksi i ri nuk është ndërtuar ende. Ajo atje është një rrëshqitje e shkaktuar nga faktori gjeologjik i ngarkuar nga shirat.
Kriminale në lidhje me publikun, por kur ka zhurma të mëdha duhet të presësh të bjerë fryrja e madhe e një plage për ta adresuar pastaj, ndryshe nuk të dëgjon njeri, është një plagë e kësaj natyre ku mjafton të vish ta shohësh dhe kupton ku je dhe se nuk ka dorë njeriu ta shkaktojë nga paaftësia”,- ka deklaruar Rama.
Discussion about this post