Shiu i ditëve të fundit, ka sjellë efekte pozitive për Korporatën Elektroenergjetike Shqiptare, duke përmirësuar situatën hidrike në Kaskadën e Drinit. Sipas të dhënave nga KESH, prurjet në datën 30 nëntor u regjistruan në 300 m3/s në hidrocentralin e Komanit dhe 320 m3/s në hidrocentralin e Vaut të Dejës. Aktualisht, HEC Koman është në kuotat e 169.6 metra mbi nivelin e detit, ndërsa Vau i Dejës 74.3 m mbi nivelin e detit.
Në këto momente, po prodhohet 10 150 mwh energji, me kapacitete të plotë në këto 2 hidrocentrale, ndërkohë që hidrocentrali Fierzës sipas KESH nuk po prodhon energji, me qëllim ruajtjen e rezervës energjetike, që aktualisht rezulton në 438 GWH. Mungesa e reshjeve të shiut nuk ka favorizuar prodhimin e energjisë në muajt e fundit, ndryshe nga 6-mujori i parë i vitit që rezultoi një vit i mirë hidrik. Kjo ka sjellë shpenzimin e miliona eurove për importin e energjisë nga ana e Operatorit të Shpërndarjes së Energjisë Elektrike, me qëllim plotësimin e nevojave konsumatore.
Sipas të dhënave, vetëm për muajin nëntor Furnizuesi i Tregut të Lirë, që është pjesë e OSHEE Group shpenzoi 76.43 mln euro, për blerjen e 275 073 MWH energji. Çmimi mesatar me të cilin u sigurua energjia rezultoi në 314.82 euro/mwh, ndërsa rekordi u shënua në një nga procedurat e fundit ku çmimi I blerjes arriti në 378.71 euro/mwh. Viti 2021 konsiderohet i mirë në drejtim të prodhimit të energjisë elektrike, por ndonëse sasia që blihet nga importit është më e vogël se viti I kaluar, shpenzimet mbeten të larta për shkak të çmimeve të shumëfishuara në tregjet ndërkombëtare.
Ndërsa Enti Rregullator i Energjisë gjatë 9-mujorit të këtij viti u prodhuan 7.37 mln mwh energji nga të gjithë burimet gjeneruese në vend, gati 2-fish më shumë në raport me një vit më parë, ku për të njëjtën periudhë u gjenerua rreth 4 mln mwh energji.
Discussion about this post